अलिबाग रायगड : अलिबाग तालुक्यातील मुशेत येथे मांगीण देवी मंदिरात बुधवार दि.१४ मे २०२५ रोजी दी लाईफ फाउंडेशन तर्फे ३० वर्षांवरील १३९ महिला व पुरुष ग्रामस्थांची रक्तातील साखरेची व रक्तदाबाची मोफत तपासणी करुन मोलाचे मार्गदर्शन करण्यात आले.
दी लाईफ फाउंडेशन हि एक सामाजिक, शैक्षणिक, आरोग्य आदी क्षेत्रात अलिबाग तालुक्यासह रायगड जिल्ह्यातील गरीब, गरजू व आदिवासी समाजाच्या सर्वांगीण विकासासाठी मोलाचे योगदान देत आपली सामाजिक बांधिलकी जपत आहे.
या संस्थेने अलिबाग तालुक्यासह इतर तालुक्यात गेल्या काही वर्षांपासून शैक्षणिक साहित्य वाटप व विविध प्रकारचे आरोग्य शिबीर आयोजित करत गरीब गरजू नागरिकांना शिक्षण व आरोग्य याबाबत जनजागृती करत प्रत्येक व्यक्ती व प्रत्येक परिसर सुखसंपन्न करण्यास मदत करत आहे. यासाठी त्यांनी प्राथमिक आरोग्य केंद्र धोकवडे व चिखली या केंद्राच्या सहकार्याने आरोग्य केंद्राच्या कार्यक्षेत्रात येणाऱ्या प्रत्येक गावांतील ३० वर्षांवरील महिला व पुरुषांची रक्तातील साखरेची व रक्तदाबाची मोफत तपासणी शिबिर आयोजित केले असल्याचे संस्थेचे प्रकल्प व्यवस्थापक शिलानंद इंगळे यांनी सांगितले आहे. तसेच पुढे बोलताना सांगितले की, HBA1C हे उपकरण अनेक महिन्यांच्या कालावधीत साधारणपणे २-३ महिन्यांत सरासरी रक्तातील साखरेची पातळी मोजण्यासाठी वापरले जाते. हे यंत्र मधुमेहाचे निदान आणि देखरेख करण्यास मदत करते, कारण ते रक्तातील साखर किती चांगल्या प्रकारे नियंत्रित केली जाते याबद्दल माहिती प्रदान करते, असे शेवटी सांगितले.
यावेळी मुशेत येथे आयोजित शिबिरात ग्रामस्थांनी उत्स्फूर्तपणे सहभाग घेत तपासणी करून घेतली. सदर शिबीर यशस्वी होण्यासाठी शिवसेना(शिंदे गट) मापगाव विभाग प्रमुख जगदीश सावंत, जागृती सावंत, मोहिनी सावंत तसेच लाईफ फाउंडेशन चे कार्यकर्ते राखी राणे आणि प्राथमिक आरोग्य केंद्र धोकवडे यांचे आरोग्य सेवकांनी महत्वाची भूमिका बजावली.
