सोगाव – अब्दुल सोगावकर : अलिबाग तालुक्यातील मुनवली येथे रायगड जिल्हा काँग्रेस पक्षाचे उपाध्यक्ष सुनिल थळे यांच्या गुरुवार दि.१५ मे २०२५ रोजीच्या वाढदिवसानिमित्त सामाजिक कार्यकर्ते सचिन घाडी व सचिन घाडी मित्रमंडळाच्या सहकार्याने दी लाईफ फाउंडेशन तर्फे ३० वर्षांवरील तब्बल १२० महिला व पुरुष ग्रामस्थांची रक्तातील साखरेची व रक्तदाबाची मोफत तपासणी करुन मोलाचे मार्गदर्शन करण्यात आले.
या शिबिराचे उद्घाटन रायगड जिल्हा काँग्रेस पक्षाचे उपाध्यक्ष सुनिल थळे यांच्या हस्ते व इतर मान्यवर ग्रामस्थांच्या उपस्थितीत मोठ्या उत्साहात करण्यात आले. यानंतर सुनिल थळे यांच्या वाढदिवसानिमित्त उपस्थित सर्व मुनवली ग्रामस्थांनी त्यांना शुभेच्छा दिल्या व पुष्पगुच्छ देऊन सन्मानित केले.
दी लाईफ फाउंडेशन हि एक सामाजिक, शैक्षणिक, आरोग्य आदी क्षेत्रात अलिबाग तालुक्यासह रायगड जिल्ह्यातील गरीब, गरजू व आदिवासी समाजाच्या सर्वांगीण विकासासाठी मोलाचे योगदान देऊन कार्य करीत आहे, या संस्थेच्या माध्यमातून व प्राथमिक आरोग्य केंद्र धोकवडे व चिखली केंद्राच्या वतीने त्यांच्या कार्यक्षेत्रात येणाऱ्या गावातील ३० वर्षांवरील महिला व पुरुष ग्रामस्थांची रक्तातील साखरेची व रक्तदाबाची मोफत तपासणी शिबिरे आयोजित करत असल्याचे संस्थेचे प्रकल्प व्यवस्थापक शिलानंद इंगळे यांनी सांगितले आहे. तसेच पुढे बोलताना सांगितले की, HBA1C हे उपकरण अनेक महिन्यांच्या कालावधीत साधारणपणे २-३ महिन्यांत सरासरी रक्तातील साखरेची पातळी मोजण्यासाठी वापरले जाते. हे यंत्र मधुमेहाचे निदान आणि देखरेख करण्यास मदत करते, कारण ते रक्तातील साखर किती चांगल्या प्रकारे नियंत्रित केली जाते याबद्दल माहिती प्रदान करते, असे शेवटी सांगितले.
यावेळी रायगड जिल्हा काँग्रेस पक्षाचे उपाध्यक्ष सुनिल थळे यांनी दी लाईफ फाउंडेशन संस्थेचे संस्थापक व त्यांचे सहकारी यांचे कार्य कौतुकास्पद व वाखाणण्याजोगी आहे, आज या संस्थेच्या माध्यमातून सर्व ग्रामस्थांची रक्तातील साखरेची व रक्तदाबाचमोफत तपासणी करून त्यांचा आर्थिक व वेळेची बचत करून ग्रामस्थांना मोठा दिलासा दिला आहे, असे कौतुक करत सांगितले. यासोबतच मुनवली ग्रामस्थांनी मला माझ्या वाढदिवसाच्या शुभेच्छा दिल्याबद्दल सर्वांचे आभार व्यक्त करतो,असे शेवटी सांगितले.
मुनवली येथे आयोजित शिबिरात परिसरातील ग्रामस्थांनी उत्स्फूर्तपणे सहभाग घेत तपासणी करून घेतली. या शिबीरावेळी यशस्वी माजी मापगाव ग्रामपंचायत सदस्य सानिका घाडी, संजय शिंदे, गोविंद अनमाने, दयाराम म्हात्रे, दिलिप मोंढे, मधुकर सूद, मनिष खाडे, शैलेश तिर्लोटकर सर, दिपक सूद, पजू मोंढे, सृष्टी मोंढे, नानी अनमाने, सार्थक अनमाने व इतर मान्यवर ग्रामस्थ मोठ्या संख्येने उपस्थित होते, सदर शिबीर यशस्वी होण्यासाठी सामाजिक कार्यकर्ते सतिश घाडी, सचिन घाडी व सचिन घाडी मित्रमंडळाचे कार्यकर्ते तसेच लाईफ फाउंडेशनचे प्रकल्प व्यवस्थापक शिलानंद इंगळे, राखी राणे आणि प्राथमिक आरोग्य केंद्र धोकवडे यांचे आरोग्य सेवकांनी मेहनत घेतली.
