शेतकरी कामगार पक्ष पुरोगामी युवक संघटनेच्या अलिबाग तालुका अध्यक्षपदाची सलग दुसऱ्यांदा जबाबदारी माझ्यावर सोपवण्यात आली, हा माझ्यासाठी मोठा सन्मान आणि अभिमानाचा क्षण आहे. मात्र ही जबाबदारी वैयक्तिक नसून संघटनेच्या उद्दिष्टांची पुन्हा एकदा शपथ घेण्यासारखी आहे. कारण शेकाप ही केवळ एक राजकीय संघटना नाही, ती विचारांची चळवळ आहे .समाज परिवर्तनाची, शोषितांच्या न्यायाची आणि सर्वसामान्यांच्या हक्कासाठी लढण्याची.
पेझारी येथील नुकत्याच पार पडलेल्या मेळाव्यात शेकापने जो स्पष्ट आणि ठाम विचार मांडला, तो पक्षाच्या आत्म्याला साजेसाच आहे. या पक्षाने नेहमीच मूल्यमापन हे निष्ठेवर, कार्यक्षमतेवर आणि जनतेशी असलेल्या नात्यावर केलं आहे. व्यवहाराच्या सौद्यांवर नव्हे. आज जेव्हा राजकारणात संधीचं राजकारण चालतं, तेव्हा शेकापची निष्ठा आणि विचारनिष्ठ धोरणं ही एक अपवादात्मक ठरतात.
याच मेळाव्यात युवकांना प्रवाहात आणण्याचा निर्णय हा केवळ एक प्रतीकात्मक पाऊल नव्हे, तर पुढच्या काळात पक्षाची दिशा निश्चित करणारा टप्पा आहे. पक्षाने नव्या नेतृत्वाला संधी दिली आहे याचा आम्हाला अभिमान आहे, पण त्याहून अधिक महत्त्वाचं म्हणजे, या नेतृत्वामागे पक्षाचं दृष्टी आणि मूल्यांचा मजबूत पाया आहे. तरुणाईला संधी देणे म्हणजेच पक्षाने आपल्या भविष्यातील खांद्यांना योग्य वेळेवर हातात झेंडा दिला आहे.
आज देशातील आणि राज्यातील राजकीय, सामाजिक आणि आर्थिक परिस्थिती अतिशय गुंतागुंतीची आहे. वाढती विषमता, रोजगाराचा अभाव, शेतकऱ्यांचे प्रश्न, महिलांची असुरक्षितता या सगळ्या संकटांचा सामना करताना फक्त घोषणांनी नाही, तर प्रामाणिक भूमिका, अभ्यासू धोरणं आणि खंबीर नेतृत्वाची गरज असते. शेकाप या दिशेने प्रगल्भपणे पावलं टाकत आहे, हे पेझारीच्या भाषणांतून स्पष्ट झालं.
‘चौथी मुंबई’च्या पार्श्वभूमीवर भूमिपुत्रांच्या हक्कांबाबत घेतलेली ठाम भूमिका, हे शेकापचं सामाजिक उत्तरदायित्व अधोरेखित करतं. विकासाच्या नावाखाली विस्थापन करणाऱ्या शक्तींविरुद्ध उभं राहणं, हा आमचा वंशपरंपरागत संघर्ष आहे. आणि हे आंदोलन केवळ विरोधासाठी नव्हे, तर न्याय्य पुनर्वसन, रोजगार, आणि हक्कांचे संरक्षण यासाठी आहे.
महात्मा फुले आणि डॉ. बाबासाहेब आंबेडकर यांच्या विचारांचा वारसा जपण्याची घोषणा ही शेकापसाठी दिखावा नसून आमच्या कार्यसंस्कृतीचा केंद्रबिंदू आहे. सामाजिक समतेसाठी केवळ भाषणं नाहीत, तर कृतीशील कार्यक्रम आणि धोरणात्मक लढा हा आमचा मार्ग आहे.
या संपूर्ण वाटचालीत माझ्यावर विश्वास टाकणारे पक्षाचे सरचिटणीस मा. जयंत भाई पाटील, मा. मानसीताई म्हात्रे, मा. चित्रलेखा पाटील ताई, आणि मा. सुरेश खैरे साहेब, सर्व कार्यकर्ते आणि युवा मित्र यांचे मी मनःपूर्वक आभार मानतो. त्यांच्या मार्गदर्शनात काम करण्याची संधी हीच माझ्या कार्यकर्त्यांच्या पिढीची खरी ताकद ठरणार आहे.
तरुणाई पक्षाकडे आकृष्ट होत आहे, ही फक्त संख्या वाढवण्याची बाब नाही ,तर एका नव्या चळवळीचा आरंभ आहे. विचार, मूल्यं, आणि समाजभान असलेली ही पिढी शेकापच्या झेंड्याखाली येते आहे. आणि येत्या काळात अजून पिढी घडवून पक्ष समृद्ध करण्याच्या दिशेने आम्ही एकत्र वाटचाल करू.
कारण, आमच्यासाठी ही केवळ नेतेपदाची घोषणा नाही ,ही एक शपथ आहे. संघर्ष, नेतृत्व आणि सामाजिक बांधिलकी यांचं समर्पण भावनेने ओतप्रोत भरलेली शपथ.
विक्रांत नंदकुमार वार्डे
B.Com,MBA
अध्यक्ष – शेकाप पुरोगामी युवक संघटना, अलिबाग तालुका
