सोगाव : अलिबाग शहरातील मांडवी मोहल्ला येथील मुस्लिम समाजातील अलिबाग नगरपालिकेचे माजी उपनगराध्यक्ष लायक अली शामिर सैय्यद(वय ६४) यांचे शनिवार दि.१२ एप्रिल २०२५ रोजी संध्याकाळी साडे पाच वाजता अलिबाग येथील जिल्हा रुग्णालयात उपचार सुरू असताना अल्पशा आजाराने निधन झाले. त्यांच्या निधनाचे वृत्त समजताच सर्वत्र शोककळा पसरली होती.
लायक अली सैय्यद शेतकरी कामगार पक्षाचे कट्टर कार्यकर्ते होते, त्यांनी पक्षाच्या पाठींब्याने अलिबाग नगरपालिकेच्या प्रभागातून नगरसेवकाची निवडणूक लढवत ते मोठ्या मताधिक्याने जिंकून देखील आले होते. यामुळे त्यांना सन २००२ च्या काळात पक्षाच्या वतीने उपनगराध्यक्ष पद बहाल करण्यात आले होते. त्यांनी काही वर्षे उपनगराध्यक्ष पद भूषवत या काळात अनेक विकासकामे पूर्णत्वास नेली अतिशय मनमिळाऊ व हसतमुख स्वभावाचे असलेले लाईक अली सय्यद सर्व समाजामध्ये व सर्व स्तरातील नागरिकांसोबत त्यांचे घनिष्ठ संबंध होते. त्यांच्या आकस्मिक निधनाची माहिती मिळाल्यानंतर राजकीय व सामाजिक क्षेत्रातील तसेच त्यांच्या परिचयातील महिला व पुरुष नागरिकांनी त्यांच्या निवासस्थानी जाऊन कुटुंबियांचे सांत्वन केले. त्यांच्या अंत्यदर्शनासाठी व अंत्यसंस्कारावेळी सर्व स्तरातील नागरिक मोठ्या संख्येने उपस्थित होते.
त्यांच्या पश्चात पत्नी, एक मुलगा, एक मुलगी, पाच भाऊ, तीन बहिणी असा मोठा परिवार आहे.
