शेकाप आक्रमक, अधिकाऱ्यांची घेतली भेट, मीटर निकामी झाल्यास ग्राहकाल बसणार भूर्दंड
अलिबाग रायगड:राज्य विदयुत वितरण कंपनीतर्फे ग्राहकांना स्मार्ट मीटर बसविणेबाबत करत असलेल्या सक्तीच्या धोरणास शेतकरी कामगार पक्ष अलिबाग तालुका व अलिबाग शहर यांनी तीव्र विरोध केला आहे. शेकापच्या महिला आघाडी प्रमुख अॅड. मानसी म्हात्रे यांनी वीज वितरणच्या अधिकाऱ्यांची भेट घेऊन विरोध दर्शविला आहे. यावेळी वीज वितरणच्या अधिकाऱ्यांना निवेदन देण्यात आहे.
गेले अनेक दिवसांपासून महाराष्ट्र राज्य विदयुत वितरण कंपनी लि.यांच्यामार्फत शहरी व ग्रामीण भागातील सर्वसामान्य नागरीकांना सातत्याने स्मार्ट विद्युत मीटर सक्तीचे करून घेण्याबाबत सांगितले जात आहे. सद्यःस्थितीत वीज वितरण कंपनीकडून इलेक्ट्रॉनीक मीटर कार्यरत आहेत. हे मीटर सुरळीतपणे चालू आहेत, असे असताना ग्राहकांना इलेक्ट्राॅनिक मीटरऐवजी स्मार्ट मीटर लावणे सक्तीचे का केले जात आहे. याबाबत सर्वसामान्य जनता आणि ग्राहकांमध्ये संभ्रम निर्माण झालेला आहे. वीज वितरण कंपनीची सदर स्मार्ट मीटर घेण्याबाबतची भूमिका अनाकलनीय आहे. या मीटरमुळे सर्व स्मार्ट मीटर बसविण्यात आल्यानंतर कोणत्याही नैसर्गिक अथवा संभाव्य आपत्तीने तो निकामी झाल्यास त्याचा भूर्दंड मात्र सर्वसामान्य ग्राहकाला सोसावा लागणार आहे. हा मीटर लावताना एलसीपी ही जोडणी करून त्याची स्वतंत्र आकारणी १८०० रुपये वसूल केले जाणार आहेत. याचा देखील भार सर्वसामान्य नागरीकांवर पडणार आहे. या बाबत कंपनीची भूमिका सर्वसामान्य ग्राहकांच्या अहिताची व लूटमारीची आहे, असे निवेदनात म्हटले आहे.
शेतकरी कामगार पक्ष हा सर्वसामान्य जनतेच्या हक्कासाठी आणि हितासाठी लढत आहे. त्याच भूमिकेतून शेतकरी कामगार पक्ष अलिबाग तालूका आणि अलिबाग शहर पदाधिकाऱ्यांच्या वतीने महाराष्ट्र राज्य विद्युत वितरण कंपनी लि. यांनी ठरविलेल्या सक्तीच्या स्मार्ट मीटर धोरणास जोरदार विरोध करत आहे. त्यामुळे शेतकरी कामगार पक्षाच्या माध्यमातून सर्व पदाधिकारी कंपनीचे सक्तीचे स्मार्ट मीटर धोरणास तिव्रविरोध दर्शवत आहेत, असेही या निवेदनात पुढे म्हटले आहे.यावेळी महिला आघाडी प्रमुख अॅड. मानसी म्हात्रे, अलिबाग तालुका चिटणीस सुरेश घरत, अलिबाग तालुका कार्यालयीन चिटणीस तुषार प्रधान, अलिबाग शहर प्रमुख अनिल चोपडा, सह शहर प्रमुख तुषार (मुन्ना) वाईकर, अलिबाग महिला शहर प्रमुख अॅड. नीलम हजारे, सह शहर प्रमुख अश्विनी ठोसर, अलिबाग शहर पुरोगामी प्रमुख कपिल अनुभवने, अलिबाग शहर सांस्कृतिक सेल प्रमुख नंदकुमार तळकर आदी उपस्थित होते. 
