राजापूर रत्नागिरी: कोकण रेल्वेला मुसळधार पावसाचा मोठा धक्का बसला असून वेरवली – विलवडे स्टेशन दरम्यान मंगळवारी संध्याकाळी दरड कोसळली होती. यामुळे भर पावसात कोकण रेल्वेच्या वाहतुकीवर परिणाम झालेला दिसून आला. मात्र तब्बल तीन तासाने दरड हटवण्यात यश ऐल असून वाहतूक पूर्ववत झाली आहे अशी माहिती कोकण रेल्वेचे जनसंपर्क अधिकारी सचिन देसाई यांनी सांगितले. 
अवकाळी पावसाचा अंदाज हवामान खात्याने वर्तवला होता. दुपार पासून रत्नागिरी आणि परिसरात मुसळधार पावसाला सुरुवात झाली आणि संध्याकाळी पावसाचा जोर वाढला. यातच कोकण रेल्वेच्या वेरवली – विलवडे स्टेशन दरम्यान संध्याकाळी ६.३० वाजण्याच्या दरम्यान दरड कोसळली होती. रुळावरच दरड कोसळल्याने कोकण रेल्वची वाहतूक काहीकाळ ठप्प झाली होती. अनेक गाड्या वेगवेगळ्या ठिकाणी उभ्या होत्या. पाऊस मुसळधार सुरू असल्याने वाहतूक केव्हा पूर्ववत होईल याचा अंदाज येत नव्हता. 
त्यानंतर रेल्वे प्रशासनाकडून दरड हटवण्यासाठी युद्ध पातळीवर कामाला सुरुवात झाली. या दरम्यान रेल्वे गाड्या ठिकठिकाणी थांबवून ठेवण्यात आल्या होत्या. मुसळधार पावसामुळे दरड हटविताना अडचणी येत होत्या. रात्री उशिरा दरड हटवण्यात येऊन वाहतूक सुरू करण्यात आली असून गाड्या दीड तास विलंबाने धावत असल्याचे जनसंपर्क अधिकारी सचिन देसाई यांनी सांगितले .
