अवैद्य अवजड वाहतूकीमुळे दुरशेत रस्ता बनतोय स्थानिकांसाठी जीवघेणा

पेण रायगड : पेण तालुक्यातील मुंबई-गोवा महामार्गावरील चुनाभट्टीपासून दुरशेत गाव व निगडावाडी, दर्गावाडी प्रधानवाडी, भेंडीची वाडी यासह अनेक आदिवासी वाड्यांना जोडणारा रस्ता हा अवजड वाहनांच्या वाहतुकीमुळे स्थानिक नागरिकांसाठी जीवघेणा ठरत आहे. या प्रश्नाकडे प्रशासकीय यंत्रणा दुर्लक्ष करत असल्यामुळे ग्रामस्थ संतप्त झाले आहेत त्यांनी या विरोधात आंदोलनाचा इशारा दिला आहे.

पेण तालुक्यातील सांकशी किल्ल्याच्या आजूबाजूच्या परिसरात अनेक बेकायदेशीर दगड खाणी व खडी क्रशरचे प्लान्ट मागील चार-पाच वर्षांपासून उभे राहिले आहेत. सध्या त्यात नव्याने काही दगड खानि व क्रशर्स प्लांटची भर पडत आहे. या अशा प्लान्टच्या स्फोटांमुळे आदिवासींच्या घरांवर दगड पडणे, घरांना हादरे बसणे, यासह मोठ्या प्रमाणात उडणाऱ्या धुळीमुळे येथील नागरिकांचे आरोग्य धोक्यात आले आहे. तर यामुळे पर्यावरणाची हानी होत असून मानवी आरोग्यावरही परिणाम होत आहे. तर येथील मुंबई गोवामहामार्ग ते दर्शित गावाकडे जाणाऱ्या रस्त्यावर दिवसाला जवळजवळ 300 ते 400 ओव्हरलोडेड अवैद्य अवजड वाहनांची वाहतूक होत आहे. त्यामुळे या रस्त्यावरून प्रवास करणाऱ्या स्थानिक नागरिकांना खूप मोठा त्रास सहन करावा लागत आहे. या रस्त्यावरून अनेक शाळकरी मुले, महिला, वयोवृद्ध, रोजगारासाठी जाणारे तरुण पायी किंवा दुचाकी वाहनाने प्रवास करत असतात. परंतु जड वाहनांच्या वाहतुकीमुळे होणाऱ्या अपघातांमुळे सर्वांना आपला जीव मुठीत घेऊन प्रवास करावा लागत आहे. या रस्त्यावर या अनेक छोटे-मोठे अपघात होऊन किरकोळ दुखापत व वाहनांचे नुकसान झाले आहे. परंतु मागील एक वर्षांपासून हे प्रमाण जास्त वाढले आहे. मागच्या १० दिवसात या वाहनांमुळे तीन मोठे अपघात झाले आहेत दि.१२ मे २०२५ रोजी दुरशेत गावातील रहिवासी पुंडलिक हिराजी गावंड आणि प्रणित तुळशीदास गावंड हे पायी चालत असताना, डंपर चालकाचे नियंत्रण सुटून त्यांच्या अंगावर डंपर येत असताना सतर्कतेमुळे ते पटकन रस्त्याच्या बाजूला झाले म्हणून मोठा अपघात होताना वाचला आणि जीवितहानी टळली. तसेच आज दि.१५ मे रोजी दुरशेत गावचे रहिवासी किशोर बाबुराव डंगर हे नाईट शिफ्ट करून दुचाकीवर घरी परत येत असताना  चुनाभट्टी-दुरशेत फाट्यावर त्यांच्या दुचाकीवर वेगाने डंपर आला. त्यांनी दुचाकीवरून उडी मारून स्वतःचा जीव वाचवला. परंतु दुचाकीचे मोठ्या प्रमाणावर नुकसान झाले आहे. इथेही जीवितहानी टळली. अशा घटना वारंवार होत आहेत.

सदर जड वाहनांच्या वाहतुकीमुळे दुरशेत-चुनाभट्टी रस्ता मोठ्या प्रमाणात खराब होऊन रस्त्याला मोठं-मोठे खड्डे पडले आहेत. या वाहनांमुळे प्रचंड धूळ उडते अन ती धूळ उडू नये म्हणून रस्त्यावर पाणी मारले जात आहे, त्या पाण्यामुळे संपूर्ण रस्ता चिखलमय होऊन पायी चालणाऱ्या लोकांना चिखलातून चालावं लागत आहे. वरील सर्व बाबतीत होणाऱ्या त्रासबाबत दि. १२ मे २०२५ रोजी पोलीस निरीक्षक पेण आणि दि. १३ मे २०२५ रोजी उपविभागीय अधिकारी पेण यांना पत्राद्वारे माहिती देण्यात आली आहे. परंतु सदर बाबतीत अजून कोणत्याही प्रकारची कार्यवाही झाली नाही त्यामुळे दुरशेत ग्रामस्थांमध्ये नाराजी व्यक्त होत असून दुरशेत ग्रामस्थ सदर जड वाहनांच्या वाहतुकीविरुद्ध तीव्र आंदोलन उभे करणार आहेत.

आमच्या दुरशेत ग्रामपंचायत हद्दीमध्येही राखीव वने असा शिक्का असलेल्या वन विभागाच्या जागेतून खडी क्रशर्सच्या अवजड वाहनांची वर्दळ सुरू असते दिवसाला जवळजवळ 300 डंपर ओव्हरलोडेड ये-जा करतात त्यामुळे आमच्या दुर्शेत गावातील नागरिकांना जीव मुठीत घेऊन या रस्त्यावरून प्रवास करावा लागतो. आमच्या गावातील अनेक नागरिकांच्या ह्या अवजड वाहनांच्या वर्दळीमुळे अपघात होऊन जीवघेणे प्रसंग निर्माण झाले परंतु वनविभाग आणि महसूल विभाग आमच्या ह्या समस्येकडे जाणीवपूर्वक दुर्लक्ष करीत आहे.-