अलिबागमध्ये पहिल्यांदाच “मेघा रे मेघा रे”


अलिबाग रायगड:‘समर्थ इन्व्हेस्टमेंट्स’ ही वित्त संस्था वित्तीय मार्गदर्शक सल्ला व सुयोग्य गुंतवणूक ह्यासाठी प्रसिद्ध आहे. विलेपार्ले (मुंबई), रत्नागिरी ह्याठिकाणी संस्थेच्या शाखा असून नुकतीच अलिबाग येथे देखील शाखा सुरु केलेली आहे. सर्व स्तरातील आबाल वृद्धाची अर्थवृद्धी सुनियोजित पद्धतीने सदैव होत रहावी व त्यामधून त्यांचे अर्थविश्व समृद्ध व्हावे ह्यासाठी संस्था कटिबद्ध आहे; परंतू सोबत त्यांचे भावविश्व देखील सुसंपन्न व्हावे ह्या उद्देशातून ठराविक अंतराने विविधांगी कार्यक्रम व उपक्रमांचे आयोजन केले जाते.अलिबागमध्ये देखील 1 जून रोजी मेघा चित्रमंदिर येथे सायंकाळी 6.00 वाजता “मेघा रे मेघा रे” हा पाऊस गीतांवर आधारित संगीत कार्यक्रम निमत्रिकांसाठी मोफत आयोजित करण्यात आला असल्याची माहिती समर्थ इन्व्हेस्टमेंटनेचे सचिन पाटील आणि वृषाली पाटील यांनी पत्रकार परिषदेत दिली.
अवघी सृष्टी वर्षा ऋतूची आतुरतेने वाट पहात असताना अवचित मे अखेरीस पावसाने सर्वत्र दमदार हजेरी लावलेली पहायला मिळत आहे आणि त्यामुळे उन्हाच्या काहीलीने व्याकुळ झालेल्या जनमानसाला सुखद दिलासा लाभला आहे. अशा वातावरणात गाजलेली लोकप्रिय पाऊसगाणी, सोबत वाफाळलेला चहा, गरमा गरम भजी ह्याचा एकत्रित आनंद घेता येणार आहे.
सुप्रसिद्ध पार्श्वगायक हृषीकेश रानडे, लोकप्रिय गायक व संगीतकार वसंत देसाई ह्यांचे पणतू नचिकेत देसाई व मोना कामत ही गायक मंडळी ही धम्माल पाउस गीते सादर करणार असून आघाडीचे रेडिओ जॉकी अमित काकडे सुसंवाद साधणार आहेत.मराठी, हिंदी लोकप्रिय पाऊसगाण्यांचे संगीत संयोजन ओंकार देवस्कर करतील तर निष्णात वादकांचा सप्तरंगी वाद्यवृंद ह्या गाण्यांना अत्युच्च उंचीवर घेऊन जाईल.
या आनंददायी वातावरणाला झालर लाभणार आहे, ती ‘लकी ड्रॉ’ ची. ह्यानिमित्ताने काही भाग्यवान विजेत्यांना आम्ही आकर्षक स्नेहभेट देऊन त्यांचा आनंद द्विगुणित करणार आहोत.या कार्यक्रमाच्या विनामुल्य प्रवेशिका समर्थ इन्हेस्टमेंट्स, कुबेराक्षे सोसायटी, शॅाप नं १०, तळ मजला, मारुती नाक्याजवळ, अलिबाग बिच रोड येथे . २८ मे पासून सकाळी ११ ते सायंकाळी ७ या वेळेत मिळतील. प्रवेशिका मिळविण्यासाठी प्रियज कवळेः ७३७८५१३२६०,वृषाली पाटीलः९३२६८६३५६१ यांच्याशी संपर्क साधावा असे आवाहन करण्यात आले आहे. पत्रकार परिषदेत समर्थ इन्व्हेस्टमेंट्सचे गौरी – निलेश जोशी आणि प्रिया थेटे तसेच समर्थ इन्व्हेस्टमेंट्स चे मुख्य मार्गदर्शक अभिजीत सरदेसाई उपस्थित होते.
आनंदी, समाधानी मन, हे ऊर्जादायी असतं ह्यावर आमची श्रद्धा आहे आणि म्हणूनच व्यवसायाच्या पल्याड जाऊन रसिकजनांना निखळ आनंद द्यावा हाच निरपेक्ष उद्देश ह्यापाठी आहे.असे सचिन आणि वृषाली पाटील यांनी सांगितले.