पेण प्रतिनिधि :पेण येथील सुहित जीवन ट्रस्टच्या सुमंगल बौद्धिक अक्षम मुलांची शाळा व एकलव्य व्यावसायिक प्रशिक्षण केंद्रात सोमवार, दिनांक १६ जून रोजी शैक्षणिक वर्ष २०२५-२६ चा पहिला दिवस मोठ्या उत्साहात साजरा करण्यात आला. शाळेच्या पहिल्या दिवशी सर्व विद्यार्थी आनंदात शाळेत परतले होते.
विद्यार्थ्यांचे स्वागत संस्थापिका व मुख्याध्यापिका डॉ. सुरेखा पाटील, सचिव वरुण पाटील, विश्वस्त मंगलदास ठाकूर, निशांत नाईकडे, साहिल पाटील आणि शिक्षक-शिक्षकेतर कर्मचाऱ्यांनी औक्षण करून आणि चाफ्याचे फूल देऊन केले.
विद्यार्थ्यांच्या स्वागतासाठी मिकी माऊस, विनी द पू आणि टेडी बेअर यासारख्या कार्टून पात्रांची उपस्थिती ठेवण्यात आली होती. विद्यार्थ्यांनी या पात्रांसोबत नृत्य करत आणि खेळत मनसोक्त आनंद लुटला. पहिल्या दिवशी वेलकम केक कापून खास सुरुवात करण्यात आली. शिक्षकांनी मुलांसोबत उन्हाळी सुट्टीतील अनुभवांवर गप्पा मारत त्यांच्याशी स्नेह वाढवला.
विद्यार्थ्यांना अन्नामृत फाउंडेशनच्या वतीने स्वादिष्ट जेवण दिले गेले. तसेच स्पोर्ट्स टी-शर्ट, ट्रॅक पॅन्ट आणि शालेय बॅग यांचेही वाटप करण्यात आले. या उत्स्फूर्त वातावरणात शाळेचा पहिला दिवस विद्यार्थ्यांसाठी अविस्मरणीय ठरला. नवीन शैक्षणिक वर्षाची अशी आनंददायी सुरुवात सर्वांसाठी प्रेरणादायी ठरली
