सोगाव – अब्दुल सोगावकर : अलिबाग तालुक्यातील किहीम ग्रामपंचायत हद्दीतील शाळेच्या पहिल्याच दिवशी १६ जून रोजी सकाळी सर्वच ठिकाणी शाळेच्या आवारात ‘कही खुशी कही गम’ असे चित्र पाहायला मिळाले, काही मुले रडत तर काही मुले हसत खेळत शाळेच्या आवारात दाखल झाले, यावेळी शालेय समितीने व शिक्षक, मुख्याध्यापिका, मुख्याध्यापक, किहीम सरपंच यांनी वाजतगाजत व गुलाबपुष्प देऊन मोठ्या उत्साहात सर्व विद्यार्थ्यांचे स्वागत केले.
चोंढी येथील राजिप शाळेच्या विद्यार्थ्यांचे प्रवेशद्वारावर स्वागत केल्यानंतर राष्ट्रगीत सादर करण्यात आले, यानंतर सर्व विद्यार्थ्यांना मान्यवरांच्या हस्ते गणवेश, शैक्षणिक साहित्य व खाऊचे वाटप करत विद्यार्थ्यांचा आनंद द्विगुणित करण्यात आला. यावेळी किहीम सरपंच पिंट्या गायकवाड यांनी सर्व विद्यार्थ्यांचे स्वागत करत विद्यार्थ्यांच्या समोर मनोगत व्यक्त करताना सांगितले की, मी सुध्दा याच मराठी शाळेत शिकून अभ्यास करून(वयाने)मोठा झालो आहे, तुम्ही सुद्धा असेच दररोज शाळेत येऊन शिका, अभ्यास करा आणि खूप खूप मोठे व्हा, तुम्हाला काय हवे आहे ते तुमच्या गुरुजी बाईंना सांगा..! असे सांगत शुभेच्छा दिल्या. यासमयी किहीम ग्रामपंचायत सदस्या कल्पिता आमले, शालेय शिक्षण समितीचे सदस्य महेश नाईक, केंद्रप्रमुख निलेश वारगे, मुख्याध्यापिका छाया काळे, शिक्षिका नीलिमा म्हात्रे, विद्या पेढवी, सीमा पाटील, बामणसुरे अंगणवाडी सेविका लीना चिंबुलकर, चोंढी अंगणवाडी सेविका निवेदिता भोईर, विद्यार्थी, विद्यार्थिनीं व त्यांचे पालक तसेच स्थानिक मान्यवर ग्रामस्थ मोठ्या संख्येने उपस्थित होते.
