अलिबाग रायगड शेतकरी कामगार पक्षाचे माजी आमदार आणि सरचिटणीस जयंत पाटील यांचे बंधू पंडित पाटील यांनी भाजपमध्ये प्रवेश केला. माजी आमदार पंडित पाटील आणि आस्वाद पाटील यांच्यासह हजारो कार्यकर्त्यांनी भाजपमध्ये पक्षप्रवेश केलाय. यावर शेकापचे सरचिटणीस जयंत पाटील यांनी पहिली प्रतिक्रिया दिली आहे. ‘ते आधीच गेलेत’ अशी बोचरी टीका जयंत पाटील यांनी केली. पंडित पाटील आणि आस्वाद पाटील यांनी विधानसभा निवडणुकीतच पक्षाच्या विरोधात काम केलं होतं, असे जयंत पाटील म्हणाले. या दोघांच्या जाण्याने पक्षाला कोणताच फरक पडणार नाही असे जयंत पाटील म्हणाले. पदवीधर निवडणुकीत शेकापमधून भाजपमध्ये गेलेल्या नेत्यांनी विरोधी उमेदवारांकडून पैसे घेऊन कार्यकर्त्यांना वाटण्याचा प्रयत्न केला होता, असे म्हणत जयंत पाटील यांची माजी आमदार पंडित पाटील यांच्यावर जहरी आरोप केलेत. शेतकरी कामगार पक्षाला 75 वर्षे झाली आहेत. अनेक नेते मंत्री आमदार या पक्षातून गेले, मात्र, पक्षाचा मतदार अजूनही कायम आहे. पंडित पाटील आणि आस्वाद पाटील यांच्या जाण्याने पक्षाला कोणताच फरक पडणार नाही असेही जयंत पाटील म्हणाले. आमची ताकद अजून तशीच असल्याचा विश्वास जयंत पाटील यांनी व्यक्त केला. पक्षात नेत्यांना किती मोठं करायचं त्याच आत्मपरीक्षण करण्याची आता वेळ आली असल्याचे यावेळी जयंत पाटील म्हणाले.
