अलिबाग (प्रतिनिधी) शुक्रवार दिनांक 20 जून 2025 रोजी कार्लेखिंड ते सारळपूल या मार्गावरून मिनीडोअर मधून प्रवास करत असताना सकाळी दहा वाजता प्रवासी श्री गणेश मल्हारी कोळी हे प्रवासी रिक्षातून उतरत असताना त्यांचा अँड्रॉइड मोबाईल रिक्षामध्ये खिशातून बाकावर पडला असता त्यावेळी रिक्षामध्ये बसलेले महात्मा गांधी विद्यालय हाशिवरे शाळेतील विद्यार्थी कुमार अथर्व सचिन पाटील इयत्ता नववी अ , कुमार अंश जयदीप पाटील इयत्ता आठवी अ व कुमार स्मित अनिकेत पाटील इयत्ता आठवी अ या विद्यार्थ्यांनी तो मोबाईल पाहिला. त्यांनी लगेच रिक्षाचालक श्री नवनीत पाटील ,रांजणखार यांना सांगितले. विद्यार्थी शाळेत आल्यावर त्यांनी शाळेतील शिक्षक श्री आंधळे सर यांच्याकडे तो मोबाईल दिला. श्री आंधळे सर यांनी रिक्षा चालक श्री नवनीत पाटील व ज्यांचा मोबाईल विद्यार्थ्यांना सापडला त्या प्रवाशांचा शोध घेऊन प्रवासी श्री गणेश मल्हारी कोळी व सौ प्रणाली गणेश कोळी, रेवसगाव यांच्याशी संपर्क साधून त्यांना शाळेत बोलावले. विद्यालयाचे मुख्याध्यापक श्री बी.डी गायकवाड सर, पर्यवेक्षक श्री प्रबळकर सर यांनी आपल्या शाळेतील विद्यार्थ्यांना रिक्षामध्ये सापडलेला मोबाईल त्यांनी शाळेत आणून दिल्याबद्दल तीनही विद्यार्थ्यांचे कौतुक केले. तसेच रिक्षा चालक श्री नवनीत पाटील यांचे आभार व्यक्त करून तो मोबाईल श्री गणेश मल्हारी कोळी यांना परत दिला.
