अलिबाग (प्रतिनिधी) तालुक्यातील वरसोली येथील ‘लोटस कॉटेज’ या हॉटेलमध्ये सुरु असलेल्या वेश्याव्यवसायावर अलिबाग पोलिसांनी धडक कारवाई करत दोन आरोपींना अटक केली आहे. या कारवाईत एक पीडित महिलेचीही सुटका करण्यात आली आहे.
ही कारवाई 24 जून 2024 रोजी पहाटे साडेतीनच्या सुमारास करण्यात आली. मिळालेल्या गुप्त माहितीनंतर अलिबाग पोलिसांनी ‘लोटस कॉटेज’वर छापा टाकून हॉटेलमध्ये सुरु असलेल्या अनैतिक व्यापाराचा पर्दाफाश केला.
या प्रकरणात महिला आरोपी सप्या (वय 50, रा. ममता नगर, अलिबाग; मूळ रा. दक्षिण 24 परगणा, पश्चिम बंगाल) व राजेश रामलखन चौपल (वय 25, रा. घरभंगा) यांना अटक करण्यात आली आहे. त्यांनी पीडित महिलेला जबरदस्तीने वेश्याव्यवसायात ढकलल्याचा आणि ग्राहकांना महिलांची सेवा पुरवल्याचा आरोप आहे.
या कारवाईत पोलिसांनी एकूण ₹25,500 किमतीचा मुद्देमाल जप्त केला आहे. या प्रकरणी अलिबाग पोलीस ठाण्यात गुन्हा क्रमांक 111/2024 अन्वये भारतीय दंड संहिता कलम 143 आणि अनैतिक व्यापार प्रतिबंध अधिनियम 1956 अंतर्गत कलम 3, 4, 5 प्रमाणे गुन्हा नोंदवण्यात आला आहे.
या कारवाईचा पुढील तपास पोलीस निरीक्षक किशोर साळे यांच्या मार्गदर्शनाखाली सुरु आहे.
