अलिबाग (प्रतिनिधी) – आज सकाळी अलिबाग पोलीस ठाण्याच्या हद्दीत जागतिक अंमली पदार्थविरोधी दिनानिमित्त जनजागृती कार्यक्रमाचे आयोजन करण्यात आले. हा कार्यक्रम को.ए.सो. इंग्लिश मिडियम शाळेमध्ये विद्यार्थ्यांसाठी घेण्यात आला.
कार्यक्रमात अलिबाग पोलीस निरीक्षक किशोर साळे यांनी विद्यार्थ्यांना अंमली पदार्थांचे दुष्परिणाम समजावून सांगितले. या व्यसनामुळे व्यक्तीचे संपूर्ण आयुष्य उध्वस्त होऊन कुटुंबाचे व देशाच्या भवितव्याचे मोठे नुकसान होते. अंमली पदार्थांचे सेवन हे केवळ शारीरिक व मानसिक आरोग्य बिघडवत नाही, तर व्यसनाधीनतेतून गुन्हेगारीकडे वाटचाल होण्याची शक्यता वाढते. त्यामुळे शिक्षणात उज्वल भविष्य घडवण्याचे स्वप्न देखील अधुरे राहते.
या कार्यक्रमात विद्यार्थ्यांनी अंमली पदार्थ सेवन न करण्याची सामूहिक शपथ घेतली. तसेच प्रिझम संस्थेच्या अध्यक्षा आंतरराष्ट्रीय खेळाडू तपस्वी नंदकुमार गोंधळी यांनी विद्यार्थिनींना स्वसंरक्षणाचे महत्त्व पटवून देत प्रात्यक्षिकाच्या माध्यमातून मूलभूत स्वसंरक्षण तंत्रांची माहिती दिली.
कार्यक्रमात ‘डायल ११२’ या आपत्कालीन सेवेबाबतही माहिती देण्यात आली. या सेवेचे महत्त्व समजावून देत उपस्थितांमध्ये जनजागृती करण्यात आली.
