अलिबाग (प्रतिनिधी) दरवर्षी प्रमाणे यंदाही अलिबाग कोळीवाडा येथून श्री एकविरा आईंची पालखी कार्ला (जि. पुणे) येथील गडावर प्रस्थानासाठी मोठ्या भक्तिभावात निघाली. या प्रस्थान सोहळ्याला विविध गावांतील भाविक मोठ्या संख्येने उपस्थित होते. ढोल-ताशांच्या गजरात, फुलांनी सजवलेल्या पालखीची शोभायात्रा उत्साहात पार पडली.
या सोहळ्याला माजी नगराध्यक्ष श्री. प्रशांत मधुसूदन नाईक तसेच माजी उपनगराध्यक्ष ॲड. मानसी म्हात्रे यांनी उपस्थित राहून श्री एकविरा आईचे दर्शन घेतले आणि भाविकांना शुभेच्छा दिल्या. त्यांनी पालखी खांद्यावर घेऊन परंपरेप्रमाणे नतमस्तक होत सहभाग नोंदवला. या सोहळ्यात महिलांचेही लक्षणीय योगदान दिसून आले. पारंपरिक वेशभूषा परिधान करून महिलांनी लेझीम, टाळ-मृदुंगांच्या गजरात उत्सवात रंग भरले.
प्रस्थानपूर्वी कोळीवाड्यात विशेष पूजा, आरती आणि महाप्रसादाचे आयोजन करण्यात आले होते. पालखी मार्गावर ठिकठिकाणी मंडप व पाणपोई उभारण्यात आल्या होत्या. विविध सामाजिक संस्थांनी सहकार्य करत भाविकांसाठी व्यवस्था केली.
या धार्मिक आणि सांस्कृतिक सोहळ्यामुळे संपूर्ण परिसर भक्तिमय झाला होता. श्री एकविरा आईच्या जयघोषात पालखीचा प्रस्थान सोहळा मोठ्या श्रद्धेने पार पडला. भक्तांनी आपल्या मनोकामना व्यक्त करत आईकडे प्रार्थना केली. ही परंपरा पुढील पिढीपर्यंत टिकवण्याचा संकल्पही अनेकांनी व्यक्त केला.
