अलिबाग (प्रतिनिधी) रोहा तालुक्यात भारतीय जनता पक्षाचे संघटन अधिक बळकट करण्याच्या दृष्टीने माजी आमदार श्री. पंडित शेठ पाटील यांनी विशेष दौरा केला. या दौऱ्याचा एक भाग म्हणून त्यांनी शासकीय विश्रामगृह, रोहा येथे भाजपा पदाधिकारी व कार्यकर्त्यांशी संवाद साधला.
या संवाद बैठकीत तालुक्यातील सध्याची राजकीय परिस्थिती, आगामी निवडणुकीची रणनीती, पक्षवाढ आणि कार्यकर्त्यांच्या अडचणी यावर सविस्तर चर्चा झाली. पाटील यांनी कार्यकर्त्यांचे मनोबल वाढवत, पक्षाच्या धोरणांचा प्रसार गावपातळीपर्यंत पोहोचवण्याचे आवाहन केले. तसेच, स्थानिक प्रश्नांची दखल घेत त्यावर उपाययोजना करण्याचे आश्वासनही त्यांनी दिले.
या प्रसंगी भाजपाचे तालुका अध्यक्ष, युवा मोर्चा, महिला मोर्चा, व्यापारी सेलसह विविध आघाड्यांचे प्रमुख पदाधिकारी उपस्थित होते. उपस्थित कार्यकर्त्यांनी स्थानिक पातळीवर पक्ष संघटनेच्या कार्याचा आढावा दिला व काही महत्त्वाच्या मागण्या आणि सूचना मांडल्या.
श्री. पाटील यांनी सांगितले की, “भाजपा ही कार्यकर्त्यांच्या ताकदीवर उभी असलेली संस्था असून, प्रत्येक कार्यकर्ता हा पक्षाचा खरा आधार आहे. सर्वांनी एकजुटीने काम केल्यास रोहा तालुक्यात भारतीय जनता पक्ष अधिक भक्कमपणे उभा राहील.”
कार्यक्रमाचे आयोजन अत्यंत उत्साही वातावरणात पार पडले. कार्यकर्त्यांच्या उपस्थितीमुळे या भेटीला विशेष महत्व प्राप्त झाले.
