अलिबाग (प्रतिनिधी): कुरुळ येथील आरसीफ कर्मचारी वसाहतीमध्ये बाहेरील व्यक्तींना प्रवेश बंद केला होता. त्यामुळे स्थानिक नागरिकांना त्रास सहन करावा लागत होता. या विरोधात विविध राजकीय व्यक्तींनी आरसीएफ प्रशासनाला जाब विचारला होता मात्र आरसीएफ प्रशासन त्याकडे दुर्लक्ष करत होते. अखेर रायगडचे खासदार सुनील तटकरे यांनी अधिकाऱ्यांना चांगलेच फैलावर घेतल्या नंतर प्रवेश देण्याबाबतचे पत्रक आरसीएफ प्रशासनाने जारी केले आहे. तर दुसरीकडे शेकापच्या महिला आघाडी प्रमुख चित्रलेखा पाटील यांनी याबाबतचे श्रेय घेण्याचा प्रयत्न सुरू केल्याचा आरोप राष्ट्रवादी काँग्रेस पक्षातील पदाधिकाऱ्यांनी केला आहे.
आरसीएफ कंपनी स्थापन झाल्यापासून गेल्या अनेक वर्षापासून कुरुळ, वेश्वी, चेंढरे येथील प्रकल्पग्रस्त, शाळा, महाविद्यालयमधील विद्यार्थी, नोकरदार वर्ग आरसीएफ कुरुळ कॉलनीतून ये जा करत होते. सुरक्षीत आणि सोयीचा मार्ग म्हणून अनेकजण कॉलनीतून येण्या जाण्याचा मार्ग स्विकारत होते. मात्र गेल्या दोन महिन्यापुर्वी कंपनी प्रशासनाने हा मार्ग स्थानिकांसाठी बंद केला. कॉलनीत प्रवेश बंद झाल्याने स्थानिकांची प्रचंड गैरसोय झाली होती.
परवानगी पत्रात काय म्हटले आहे
सुरक्षेच्या नियमांच्या आधीन राहून अटींवर ही परवानगी देण्यात आली आहे. आरसीएफ कर्मचारी वगळता इतर व्यक्तींना कंपनी प्रशासनाकडून ओळखपत्र दिले जाणार आहे. वसाहतीमध्ये प्रवेश केल्यावर सुरक्षा नियमांचे पालन करणे. शिस्त शांततेचे पालन होईल याची दक्षता बंधनकारक राहणार आहे. चालणाऱ्यांसाठी ओळखपत्र धारकांना वसाहतीचा वापर सकाळी सहा ते नऊ सायंकाळी सहा ते रात्री आठ या वेळेत करता येणार असल्याचे लेखी पत्र मुख्य प्रशासन व्यवस्थापक महेश पाटील यांनी दिले आहेत.
