माणगाव बस स्थानकात पैसे स्वीकारताना रंगेहात पकडले
जमिनीची मोजणी, आकारफोड व प्रतसाठी मागितली ५० हजारांची लाच
रायगड जिल्ह्याला लाचखोरीचे ग्रहण लागले आहे. अनेक सरकारी कार्यालयातील लोकसेवक, गलेलठ्ठ पगार असतानाही वरकमाईच्या अमिषाला बळी पडत आहेत. अमुक रक्कम द्या.. तुमची फाईल सर्वात आधी पुढे घेतो, तुमचं काम होऊन जाईल… असे किस्से अनेक कार्यालयात घडताना दिसतात. याचा भुर्दंड मात्र सामान्य नागरिकांना भोगावा लागतो आहे. अशीच एक संतापजनक घटना म्हसळा तालुक्यातून उघड झाली आहे. म्हसळा भूमी अभिलेख कार्यालयातील एका भूकरमापक कर्मचार्‍याला जमिनीची मोजणी, आकारफोड व क प्रत देण्याच्या मोबदल्यात ५० हजार रुपयांची लाच स्वीकारताना लाचलुचपत विभागाच्या पथकाने रंगेहाथ पकडले आहे. विशाल भिमा रसाळ, (वय-29 वर्षे, पद- लिपिक तथा भूकरमापक) असे लाचखोर कर्मचार्‍याचे नाव असून विशालने तक्रारदाराकडून ५० हजार रुपये स्वीकारताना त्याला माणगाव एसटी स्टँड येथे रंगेहात पकडण्यात आले.
ही करवाई पोलीस उपअधीक्षक शशीकांत पाडावे, लाचलुचपत प्रतिबंधक विभाग यांच्या मार्गदर्शना खाली सहाय्यक फौजदार विनोद जाधव, अरुण करकरे, हवलदार महेश पाटील, सागर पाटील यांच्या टीमने केली. दरम्यान, म्हसळा भुमीलेख कार्यालयात सतत जमिनीच्या एजेंटचा वावर असतो. सामान्य नागरिकांनी जमीन मोजणीचा अर्ज केला तर त्यांचा नंबर एक वर्षानंतर येतो. मात्र एजेंटकडून अथवा पाकीट भरून दिल्यास जमिनीची मोजणी एक महिन्यात पार पडत असल्याचे आरोप नागरिकांकडून करण्यात येत आहेत. या कार्यालयातील भ्रष्टाचारी कर्मचाऱ्यांकडून म्हसळा बायपास येथील अनेक जमिनींची चुकीच्या पद्धतीने मोजणी करण्यात आल्याची तक्रार अनेक नागरिकांनी केली आहे. याबाबत तपास करून भ्रष्ट अधिकऱ्यांना शासन करण्याची मागणी नागरिक करत आहेत.
