अलिबाग (प्रतिनिधी): मुरुड तालुक्यातील काशीद समुद्रकिनारी एक दुःखद घटना घडली. पुण्यातून पर्यटनासाठी आलेला तनिष्क मल्होत्रा (वय 20 वर्ष) हा युवक समुद्रात पोहताना बुडाला होता. या घटनेनंतर स्थानिक पोलीस प्रशासनाने तात्काळ शोधमोहीम राबविली.
प्रारंभी सह्याद्री वन्यजीव रक्षणार्थ सामाजिक संस्थेची मदत घेण्यात आली तसेच तटरक्षक दलाच्या हेलिकॉप्टरच्या साह्याने हवाई शोध घेण्यात आला. मात्र, युवकाचा थांगपत्ता लागत नव्हता.
शेवटी अत्याधुनिक उपकरणांची मदत घेण्यात आली. RESQ SVRSS या टीमकडे उपलब्ध असलेल्या अ‍ॅडव्हान्स थर्मल ड्रोनच्या सहाय्याने बुधवारी सकाळी ७ वाजता पुन्हा शोधमोहीम सुरू करण्यात आली. अवघ्या ४५ मिनिटांत थर्मल तंत्रज्ञानाद्वारे युवकाचा मृतदेह समुद्रात आढळून आला.
मृतदेह त्वरित किनाऱ्यावर आणून पोलिसांच्या ताब्यात देण्यात आला. पुढील तपास मुरुड पोलीस करीत आहेत. या घटनेमुळे काशीद किनाऱ्यावर हळहळ व्यक्त केली जात असून, पर्यटकांनी समुद्रकिनारी विशेष काळजी घेण्याचे आवाहन स्थानिक प्रशासनाकडून करण्यात येत आहे.
पर्यटनस्थळी अशी दुर्दैवी घटना घडू नये यासाठी सुरक्षा व्यवस्थेची पुनर्रचना करण्याची गरज अधोरेखित होत आहे. प्रशासनाने भविष्यात अशा घटनांना आळा बसावा यासाठी अधिक दक्षता घेण्याचे आश्वासन दिले आहे.
