रायगड (प्रतिनिधी) : रेवदांडा- कोरलई संशयित बोट प्रकरणाबाबत अद्यापही पोलिसांनी मौन बाळगले आहे. त्यामुळे संभ्रम वाढला आहे. तर दुसरीकडे रायगडच्या समुद्रकिनारपट्टीच्या भागात पोलिसांनी रात्रभर सर्च ऑपरेशन राबवल्याचे दिसून आले. तसेच अलिबाग आणि मुरुड येथील चेक पोस्टवर वाहनांची झाडाझडती घेण्यात येत होती. त्यामुळे सुरक्षा यंत्रणा अलर्ट मोडवर असल्याचे दिसून आले
दरम्यान, आमची रुटीन ऍक्टिव्हिटी असल्याचे अतिरिक्त पोलीस अधीक्षक अभिजीत शिवतारे यांनी स्पष्टीकरण देताना सांगितले.
रुटीन ऍक्टिव्हिटी असली तरी रात्रभर पोलिसांना अलर्ट मोडवर राहण्यास का सांगितले होते, तसेच सकाळी थेरोंडा येथे ग्रामस्थांची बैठक घेऊन, संशयास्पद बोट कोणी बघितली आहे का अशी विचारणा का करण्यात आली होती. तसेच संशयास्पद हालचालींवर लक्ष ठेवावे आणि नागरिकांनी सतर्क राहावे, अशा सूचना देण्यात आल्याचे ग्रामस्थांनी सांगितले. पोलीस माहिती लपवत आहेत का याबाबत शंका उपस्थित केली जात आहे.
सूत्रांनी दिलेल्या माहिती नुसार
रविवारी पोलिसांना एक अलर्ट आला होता. दुपारी 3 वाजण्याचा सुमारास रडारवर काही संशयास्पद हालचाली दिसून आल्या होत्या. मात्र हा संदेश पोलीस यंत्रणेला फार उशिरा मिळाल्याचे बोलले जाते. त्यानंतर रायगडच्या पोलिस अधीक्षक आचल दलाल आपल्या यंत्रणेसह घटनास्थळी रात्री नऊ-साडेनऊच्या दरम्यान पोहोचल्या होत्या. मात्र काळाकुट्ट अंधार असल्याने त्यांना तेथे काही आढळून आले नाही. माहिती मिळाल्यावर सांगण्यात येईल असे त्यांनी सांगितले. अद्यापही पोलिसांनी योग्य माहिती दिली नसल्याने संभ्रम आणि भीती कायम आहे.
