मुख्यमंत्री उपमुख्यमंत्री यांनी केली पाहणी
रायगड (प्रतिनिधी) : मुख्यमंत्री देवेंद्र फडणवीस यांनी आज नवी मुंबई आंतरराष्ट्रीय विमानतळ (NMIAL) प्रकल्पाच्या प्रगती कामांची पाहणी केली. त्यांनी स्पष्ट केले की, विमानतळाचे ९४% काम पूर्ण झाले असून उर्वरित कामे सप्टेंबर २०२५ पूर्वी पूर्ण करून पहिले प्रवासी विमान टेक-ऑफ करेल.
यावेळी उपमुख्यमंत्री एकनाथ शिंदे, विविध मंत्री, आमदार, सिडको व प्रशासनातील वरिष्ठ अधिकारी उपस्थित होते. मुख्यमंत्री फडणवीस म्हणाले की, “या विमानतळावर जगातील सर्वात जलद बॅगेज-क्लेम प्रणाली कार्यान्वित होणार असून, प्रवाशांना जागतिक दर्जाची सेवा अनुभवता येईल.”
(NMIAL) नवी मुंबई आंतरराष्ट्रीय विमानतळ व सिडकोच्या संयुक्त सहकार्यात उभारल्या जात असलेल्या या प्रकल्पाचा एकूण खर्च सुमारे १९,६४७ कोटी रुपये इतका आहे. जून २०२५ पर्यंत ९६.५% भौतिक प्रगती झाल्याची माहिती अधिकाऱ्यांनी दिली.
या भव्य विमानतळाच्या माध्यमातून दरवर्षी सुमारे २० दशलक्ष प्रवासी आणि ०.८ दशलक्ष मेट्रिक टन मालवाहतूक हाताळण्याची क्षमता निर्माण होणार आहे. या प्रकल्पाचे उद्घाटन पंतप्रधान नरेंद्र मोदी यांच्या हस्ते होणार असल्याची माहितीही यावेळी देण्यात आली.
