नवी दिल्ली : महाराष्ट्र शासनाचे ख्यातनाम विशेष सरकारी वकील उज्ज्वल निकम यांची राष्ट्रपती द्रौपदी मुर्मू यांनी राज्यसभेवर नामनिर्देशित खासदार म्हणून नियुक्ती केली आहे. त्यांच्या न्यायक्षेत्रातील दीर्घ सेवेसाठी आणि महत्त्वाच्या खटल्यांमधील भरीव कामगिरीसाठी ही निवड करण्यात आली आहे.
उज्ज्वल निकम हे 1993 मुंबई बॉम्बस्फोट, मुंबई दहशतवादी हल्ला, कसाब खटला , यासह राज्यातील बहुतेक जिल्हयातील इतर अनेक गाजलेल्या खटल्यांचे सरकारी पक्षातर्फे यशस्वी नेतृत्व करणारे वकील म्हणून ओळखले जातात. त्यांच्या प्रभावी युक्तिवाद शैलीमुळे त्यांनी हजारो गुन्हेगारांना शिक्षा सुनावण्यात महत्त्वपूर्ण भूमिका बजावली आहे.
त्यांच्या या नियुक्तीमुळे कायदा व न्याय क्षेत्रातून देशाच्या धोरण निर्मितीत मोलाचे योगदान मिळेल, असा विश्वास व्यक्त केला जात आहे. देशसेवेतील त्यांचे योगदान आता संसदेच्या माध्यमातून अधिक व्यापक पातळीवर पोहोचणार आहे.
