अलिबाग (प्रतिनिधी): अलिबागमधील उसर येथे प्रस्तावित असलेल्या शासकीय वैद्यकीय महाविद्यालयाची इमारत पूर्ण करणे ही काळाची गरज असल्याचे मत खासदार सुनील तटकरे यांनी व्यक्त केले. या महाविद्यालयामुळे परिसराचा सर्वांगीण विकास होणार असून, कोणत्याही अडमुठ्या भूमिकेमुळे हे काम अडकू नये, असे ते म्हणाले.
राष्ट्रवादी काँग्रेस भवनात आयोजित पत्रकार परिषदेत ते बोलत होते. अलिबागमधील शासकीय वैद्यकीय महाविद्यालयाची इमारत गेली पाच वर्षे रखडली आहे. अदिती तटकरे पालकमंत्री असताना या कॉलेजसाठी मंजुरी मिळवली गेली होती. केंद्र शासनाच्या माध्यमातूनही यासाठी योगदान दिले गेले. मात्र काही तांत्रिक अडचणींमुळे प्रकल्प रखडला आहे.
“अलिबागमध्ये फारसे लक्ष घालत नाही, पण सार्वजनिक हिताच्या कामांमध्ये लक्ष घालणे आवश्यक आहे. कोणाला काहीही वाटू दे, मी हे काम मार्गी लावणारच,” अशी ठाम भूमिका तटकरे यांनी मांडली.
