रायगड (प्रतिनिधी): रायगड जिल्ह्यात मुसळधार पावसाचा इशारा हवामान विभागाने दिल्याने खबरदारीचा उपाय म्हणून जिल्हाधिकारी किरण न. जागवे यांनी माणगांव, तळा, रोहा, पाली, महाड, पोलादपूर या तालुक्यांतील सर्व शासकीय व खासगी शाळांना दिनांक १५ जुलै २०२५ रोजी एक दिवसाची सुट्टी जाहीर केली आहे.
भारतीय हवामान खात्याने दिलेल्या अंदाजानुसार रायगड जिल्ह्यात १५ जुलै रोजी अतिवृष्टीचा (Heavy to Very Heavy Rainfall) इशारा देण्यात आला आहे. त्यामुळे जिल्ह्यातील काही भागांमध्ये पूरजन्य परिस्थिती निर्माण होण्याची शक्यता असून विद्यार्थ्यांच्या सुरक्षेच्या दृष्टीने हा निर्णय घेण्यात आल्याचे आदेशात नमूद करण्यात आले आहे.
सदर निर्णयानुसार वरील तालुक्यांमधील प्राथमिक, माध्यमिक, उच्च माध्यमिक शाळा आणि अंगणवाड्या देखील बंद ठेवण्यात येणार आहेत. आपत्ती व्यवस्थापन कायद्यानुसार जिल्हा आपत्ती व्यवस्थापन प्राधिकरणाने हा आदेश दिला असून सर्व संबंधित यंत्रणांनी त्याची काटेकोरपणे अंमलबजावणी करावी, असेही आदेशात स्पष्ट करण्यात आले आहे.
