अलिबाग (प्रतिनिधी) : ग्रामीण भागातील कबड्डीपटूंना अद्यापही योग्य सुविधा आणि मार्गदर्शनाचा अभाव आहे. त्यामुळे अनेक प्रतिभावान खेळाडू मागे पडतात. शालेय पातळीवर खेळणाऱ्या नवोदित खेळाडूंना प्रोत्साहन देऊन त्यांचे योग्य मार्गदर्शन करणे, ही ज्येष्ठ कबड्डीपटूंची जबाबदारी आहे, असे मत महाराष्ट्र राज्य कबड्डी असोसिएशनचे कार्याध्यक्ष व माजी खासदार गजानन किर्तीकर यांनी व्यक्त केले.
कबड्डीमहर्षी स्व. बुवा साळवी यांच्या जयंतीनिमित्त मंगळवारी (दि. १५ जुलै) रायगड जिल्हा कबड्डी असोसिएशनच्या यजमानपदाखाली पोयनाड येथील जय मंगल कार्यालयात आयोजित ‘कबड्डी दिन’ कार्यक्रमात ते बोलत होते.
कार्यक्रमात गजानन किर्तीकर यांच्या हस्ते कबड्डी क्षेत्रातील ज्येष्ठ कार्यकर्ते, खेळाडू, पंच, पत्रकार आणि प्रशिक्षक यांचा सन्मान करण्यात आला.
गजानन किर्तीकर पुढे म्हणाले की, “कबड्डी खेळाडूंना शासकीय सेवेत आरक्षण उपलब्ध आहे. त्याचा लाभ घेऊन खेळाडूंना नोकरी मिळवून देण्यासाठी प्रयत्न करणे गरजेचे आहे. तसेच बँका, विमा कंपन्या, रेल्वे व अन्य नफा मिळवणाऱ्या कंपन्यांमध्ये कबड्डीपटूंची भरती करून संघ तयार करण्यात यावा. यासाठी राज्य आणि जिल्हा कबड्डी संघटनांनी पुढाकार घ्यावा.”
या कार्यक्रमास महाराष्ट्र कबड्डी असोसिएशनचे सरकार्यवाह बाबुराव चांदेरे, खजिनदार मंगल पांडे, शकुंतला खटावकर, माजी सरकार्यवाह मोहन भावसार, अ‍ॅड. आस्वाद पाटील, कार्यकारिणी सदस्य रवींद्र देसाई, रायगड जिल्हा कबड्डी असोसिएशनचे कार्याध्यक्ष संजय पाटील यांच्यासह अनेक मान्यवर उपस्थित होते.
रायगड जिल्हा कबड्डी असोसिएशच्या कार्यवाह डॉ. चित्रा पाटील यांनी प्रास्ताविक केले.सूत्रसंचालन आणि आभारप्रदर्शन मिलिंद पाटील यांनी केले. कार्यक्रम यशस्वी करण्यासाठी जिल्हा कबड्डी संघटनेच्या पदाधिकाऱ्यांनी विशेष परिश्रम घेतले.
