खोपोलीतील मंगलम ऑर्गेनिक्स कापूर फॅक्टरीत आगीचे भयाण तांडव 

खोपोली (प्रतिनिधी): खालापूर तालुक्यातील मंगलम या कापूर बनवणाऱ्या कंपनीत दिनांक १६ जुलैच्या मध्यरात्री भीषण आग लागल्याने हाहाकार उडाला. या आगीत कोणतीही जिवितहानी झाली नाही, मात्र साहित्य सामुग्री जळाल्याने बेसुमार वित्तहानी झाली आहे. या आगीवर नियंत्रण मिळवण्यासाठी एकूण 13 एजन्सीजच्या फायर ब्रिगेड टीम दाखल झाल्या होत्या. तब्बल ४ तासाच्या अथक परिश्रमानंतर आगीवर नियंत्रण मिळवता आले.

हेल्प फाउंडेशनच्या मेंबर्सनी खालापूर तालुका पोलीस स्टेशनचे पोलीस निरीक्षक सचिन पवार आणि मंडळ अधिकारी संदेश पानसरे यांच्या मार्गदर्शनाखाली घटनास्थळी येणाऱ्या फायर ब्रिगेड टीमचे नियोजन, संसाधनांची जुळवाजवळ, संसाधनांची वाहतूक इत्यादी बाबतीत मोलाची भूमिका बजावली आणि आग लागलेल्या ठिकाणी सुरक्षेच्या साधनांचा वापर करत प्रत्यक्ष मदतकार्य केले.

खालापूर तालुक्याचे तहसीलदार अभय चव्हाण, उपविभागीय पोलीस अधिकारी विक्रम कदम, नायब तहसीलदार सुधाकर राठोड यांनी तत्काळ घटनेची तीव्रता जाणून घेऊन फायर ब्रिगेडच्या टीम बोलावण्याने आग इतरत्र पसरू शकली नाही. कापूर आणि इतर पेट्रोलजन्य पदार्थ मोठ्या प्रमाणात होते मात्र अत्यंत शिस्तबद्ध पद्धतीने सर्व एजन्सीजनी आगीवर नियंत्रण मिळवल्याने सुदैवाने जीवितहानी टळली. मात्र मोठ्या प्रमाणात नुकसान झाल्याचे समजते.