झेप फाऊंडेशन व विश्वरूप प्रतिष्ठानच्या संयुक्त विद्यमाने शिवणक्लास प्रशिक्षण

अलिबाग (प्रतिनिधी): झेप फाऊंडेशन आणि विश्वरूप प्रतिष्ठान यांच्या संयुक्त विद्यमाने पंचक्रोशी मध्ये शिवणक्लास प्रशिक्षण दिलं आहे.यामध्ये ८० पेक्षा जास्त महिलांनी सक्रिय सहभाग घेतला आहे. हे ३० दिवसांचे प्रशिक्षण असून,त्यात जास्तीत जास्त प्रशिक्षण कसे देता येईल याची जबाबदारी संस्थेने घेतली आहे.

        शासनाने काढलेल्या पूर्वपरंपरागत जी.आर. मध्ये जी प्रशिक्षणे दिली आहेत, त्यात ब्युटिशियन, शिवणक्लास या व्यतिरिक्त आता रायगडमधील भौगोलिक परिस्थिती, येणारी तिसरी मुंबई तसेच आंतरराष्ट्रीय विमानतळाला आवश्यक असणारी प्रशिक्षणे ही शासनातर्फे देण्यात यावी, अशी मागणी डॉ.चित्रा पाटील यांनी शासनाकडे केली आहे.

         आगामी नव्या मुंबई विमानतळ प्रकल्पासाठी कोणत्या प्रकारचे तांत्रिक प्रशिक्षण घेणे गरजेचे आहे किंवा कोणत्या प्रकारचा कोर्स केला तर महिला आपल्या स्वतःच्या पायावर उभ्या राहतील या दृष्टिकोनातून आपल्याला विचार करणे गरजेचे आहे. असे डॉ.चित्रा पाटील यांनी मेट्रो रायगडशी बोलताना सांगितले.

         त्याचप्रमाणे भविष्यात उपयोगी येणारे वेगवेगळे प्रशिक्षण देखील देण्याचा प्रयत्न केला जाईल, असे झेप फाऊंडेशनच्या संस्थापिका डॉ.चित्रा पाटील म्हणाल्या यावेळी मंजुषा कुद्रीमोती तसेच विश्वरूप प्रतिष्ठानच्या प्रोजेक्ट हेड मीनल बुटाला त्याचप्रमाणे झेप फाऊंडेशन आणि विश्वरूप प्रतिष्ठानच्या सदस्या तसेच प्रशिक्षणार्थी महिला मोठ्या संख्येने उपसस्थित होत्या.