पेण (प्रतिनिधी): पेण तालुक्यातील नागरिकांच्या तक्रारीनंतर रायगड जिल्हा पोलिसांनी अवैध सावकारी करणाऱ्या दोन व्यक्तींविरोधात मोठी कारवाई केली आहे. परवानगी न घेता सावकारी व्यवसाय करत नागरिकांना जादा व्याज लावून आर्थिक छळ केल्याचे या तपासात निष्पन्न झाले आहे.
पोलीस अधीक्षक सौ. आँचल दलाल यांच्या आदेशावरून पेण शहरातील सूर्यकांत जोमा पाटील (वय ७०) व भरत सूर्यकांत पाटील (वय ३५, रा. गोविंदनगर, पेण) यांच्यावर कारवाई करण्यात आली. स्थानिक गुन्हे अन्वेषण शाखेच्या तपासात हे दोघे बिनपरवाना कर्ज वाटप करत असल्याचे आढळून आले असून, त्यांनी व्याजाच्या बदल्यात नागरिकांची मालमत्ता बळकावल्याचेही समोर आले आहे.
या प्रकरणी “सहकार पथक व दस्तऐवज विभाग” यांच्या समन्वयाने पुढील कायदेशीर कारवाई सुरू करण्यात आली आहे. जिल्हा उपनिबंधक (सहकारी संस्था), अलिबाग येथील प्रमोद जगताप यांनी या संदर्भात अधिक माहिती दिली. स्थानिक शाखेच्या अधिकाऱ्यांच्या मदतीने पंचनामे करून आवश्यक कागदपत्रे गोळा करण्यात आली आहेत. तक्रारीच्या प्रक्रियेत गोपनीयता राखत सहकार विभागाच्या मार्गदर्शनाखाली काम केले जात आहे.
या कारवाईमध्ये पोलीस निरीक्षक मिलिंद खोपडे, भास्कर जाधव, प्रशांत जोशी, मोरेश अंबोळे, रेखा मत्रे, सचिन नवाळे यांच्यासह अनेक अधिकारी आणि कर्मचारी सहभागी होते.
