अलिबाग (प्रतिनिधी): वेळेवर घेतलेल्या निर्णयामुळे आणि धाडसामुळे एक मोठा अपघात टळला! नागाव चिंतामणी गल्लीमध्ये वीजतार पाण्यात पडून संपूर्ण परिसर धोकादायक झाला असताना, वीज वितरण कंपनीचे कर्मचारी सचिन कवठेकर यांनी प्रसंगावधान राखत तात्काळ वीजपुरवठा बंद केला. त्यांच्या सूजबूज आणि तत्परतेमुळे मोठा अनर्थ टळला आणि अनेकांचे प्राण वाचले, अशी प्रतिक्रिया ग्रामस्थांनी.दिली. त्यांच्या या कृतीचे सर्वत्र कौतुक होत आहे. सदरची घटना 21 जुलै रोजी सकाळच्या समोरास घडली.
सुदैवाने, वीज वितरण कंपनी MSEB चे कर्मचारी सचिन कवठेकर यांनी वेळीच घटनास्थळी धाव घेतली आणि वीजपुरवठा बंद केला. त्यामुळे मोठा अनर्थ टळला. त्यांच्या तात्काळ कृतीबद्दल गावकऱ्यांनी त्यांचे आभार मानले आहेत.
मात्र, वीजतार अजूनही तशीच पडलेली असल्यामुळे धोका कायम आहे. त्यामुळे ती तात्काळ नवीन वायरने आणि गार्डिंग वायर लावून बदलणे गरजेचे आहे.
ही घटना गांभीर्याने घेऊन ग्रामपंचायतीतर्फे एक निवेदन तयार करून सदस्यांनी थेट MSEB कार्यालयात जाऊन दिले असून, लवकरात लवकर कारवाई करण्याची मागणी करण्यात आली आहे.
हा विषय फक्त वीज व्यवस्थापनाचा नाही, तर लोकांच्या सुरक्षेशी संबंधित आहे. वेळेत उपाययोजना न झाल्यास भविष्यात मोठी दुर्घटना होण्याची शक्यता असल्याने संबंधित विभागाने तात्काळ लक्ष घालावे, अशी मागणी ग्रामस्थांनी केली आहे.
