सागरी पोलिसांच्या सतर्कतेने महिला बालंबाल बचावली
नवी मुंबईच्या बेलापूरमध्ये भरधाव कारला भीषण अपघात
नवी मुंबई (प्रतिनिधी): तंत्रज्ञानाचा आधार घेत प्रवास करणे अनेकदा सोयीचे वाटते, मात्र याच तंत्रज्ञानावरचा अंधविश्वास जीवावर बेतू शकतो. असाच एक थरारक प्रकार शुक्रवारी पहाटे १ वाजता नवी मुंबईच्या बेलापूरमध्ये घडला. गुगल मॅपवर दाखवलेल्या मार्गाचा अंदाज घेत उलवेच्या दिशेने भरधाव जात असलेली MH 04GE 8636 क्रमांकाची ऑडी कार ध्रुवतारा जेट्टीवरून थेट खाडीत कोसळली. 
या भीषण घटनेत सुदैवाने सागरी सुरक्षा पोलिसांच्या सतर्कतेमुळे कारमधील महिलेचे प्राण वाचवण्यात यश आले. मिळालेल्या प्राथमिक माहितीनुसार, ही कार महिला चालवत होती. मार्ग माहित नसल्यामुळे तिने गुगल मॅपचा आधार घेतला. मात्र मॅपवर दिशादर्शक रस्ता स्पष्ट न दिसल्यामुळे ती चुकून खाडी पुलावर न जाता त्याखालील ध्रुवतारा जेट्टीकडे वळली. जेट्टीच्या टोकाला कोणताही सुरक्षा कठडा नसल्यामुळे कार थेट खाडीत कोसळली. 
ही घटना जवळच असलेल्या सागरी सुरक्षा पोलिसांच्या निदर्शनास आली. त्यांनी क्षणाचाही विलंब न करता बचाव पथकासह घटनास्थळी धाव घेतली. गस्ती व रेस्क्यू बोटीच्या मदतीने खाडीत वाहत असलेल्या महिलेपर्यंत पोहोचत तिचा जीव वाचवण्यात आला. त्यानंतर क्रेनच्या साहाय्याने कारलाही बाहेर काढण्यात आले.
सुदैवाने पोलिस चौकीजवळच ही दुर्घटना घडल्यामुळे वेळीच मदत मिळाली आणि एक बळी टळला. या प्रकरणानंतर जेट्टीसारख्या ठिकाणी सुरक्षेसाठी कठडे लावण्याची गरज अधोरेखित झाली आहे.
