अलिबाग (प्रतिनिधी) : अलिबागचे ज्येष्ठ उद्योजक आणि सामाजिक कार्यकर्ते स्व. गजेंद्र तुकाराम दळी यांच्या स्मरणार्थ अलिबागमध्ये शोकसभेचे आयोजन करण्यात आले. लायन्स क्लब अलिबाग आणि ज्येष्ठ नागरिक संघटना यांच्या संयुक्त विद्यमाने गुरुवारी (दि. ३१ जुलै) शहरातील वेव्हज हॉटेलमधील सभागृहात ही सभा पार पडली.
या शोकसभेत शेकाप राज्य महिला आघाडीच्या प्रमुख अॅड. मानसी म्हात्रे म्हणाल्या, “स्व. गजेंद्र दळी हे अलिबागमधील ज्येष्ठ उद्योजक होते. त्यांनी आपल्या कार्यकाळात अनेक लघुउद्योगांना चालना दिली. समाजातील वंचित घटकांसाठी ते नेहमीच सक्रिय होते. अलिबाग नगरपरिषदेच्या कारभारात त्यांचे मोलाचे योगदान राहिले. ते अलिबागचे सच्चे प्रेमी होते. सामाजिक बांधिलकी जपत त्यांनी अनेकांना व्यवसायात प्रोत्साहन दिले.”
यावेळी शेकाप राज्य कामगार आघाडीचे प्रमुख प्रदीप नाईक, लायन्स क्लबचे अनिल जाधव, अनिल चोपडा, तसेच शहरातील विविध क्षेत्रांतील मान्यवर मंडळी, सत्यजित दळी, विश्वजीत दळी व दळी कुटुंबिय उपस्थित होते.
सभेत उपस्थित मान्यवरांनी स्व. गजेंद्र दळी यांच्या सामाजिक, औद्योगिक आणि सार्वजनिक कार्याचा गौरव करत त्यांना आदरांजली अर्पण केली. त्यांच्या निधनाने अलिबागने एक दूरदृष्टी असलेले, लोकहितासाठी झटणारे व्यक्तिमत्त्व गमावले, अशी भावना यावेळी व्यक्त करण्यात आली.
