अलिबाग (प्रतिनिधी): शेतकरी कामगार पक्षाचा 78 वा वर्धापन दिन शनिवारी ( दि. 2 ऑगस्ट ) नवीन पनवेलमधील पोलीस मैदाना येथे भव्य मेळावा आयोजित करण्यात आला आहे. त्याची जय्यत तयारी सुरू झाली आहे. 25 हजारहून अधिक कार्यकर्ते या मेळाव्यात सहभागी होणार असल्याची माहिती शेकाप जिल्हा चिटणीस सुरेश खैरे यांनी दिली.
शेतकरी कामगार पक्षाच्या वर्धापन दिनानिमित्त आयोजित मेळाव्यामध्ये मनसेचे अध्यक्ष राज ठाकरे, काँग्रेसचे आ. विजय वडेट्टीवार, राष्ट्रवादी शरदचंद्र पवार पक्षाचे प्रदेशाध्यक्ष शशिकांत शिंदे व शिवसेना उद्धव ठाकरे पक्षाचे नेते खा. संजय राऊत, आणि शेकाप सरचिटणीस जयंत पाटील यांची प्रमुख उपस्थिती असणार आहे. यावेळी शेकापचे ज्येष्ठ नेते शंकरराव म्हात्रे, द्वारकनाथ नाईक, प्रा. एस.व्ही. जाधव, शेकाप कार्यालयीन चिटणीस ॲड. राजेंद्र कोरडे, खजिनदार अतुल म्हात्रे, माजी आ. बाळाराम पाटील, रायगड जिल्हा परिषद माजी अध्यक्षा सुप्रिया पाटील, शेकाप राज्य प्रवक्त्या चित्रलेखा पाटील, शेकाप राज्य महिला आघाडी प्रमुख ॲड. मानसी म्हात्रे, अलिबागचे माजी नगराध्यक्ष प्रशांत नाईक, शेकाप कामगार आघाडी प्रमुख प्रदिप नाईक, रायगड बाजारचे चेअरमन नृपाल पाटील, शेकाप जिल्हा चिटणीस सुरेश खैरे, शेकाप जिल्हा सहचिटणीस ॲड. गौतम पाटील, शंकरराव म्हसकर, पनवेलचे माजी पंचायत सभापती काशीनाथ पाटील, पनवेल कृषी उत्पन्न बाजार समितीचे सभापती नारायण घरत, वेगवेगळ्या आघाडीचे पदाधिकारी, जिल्हा परिषद, पंचायत समितीचे माजी पदाधिकारी, सदस्य, ग्रामपंचायतीचे आजी-माजी पदाधिकारी, सदस्य, राजकीय, सामाजिक, शैक्षणिक, क्रीडा अशा सर्वच क्षेत्रातील पदाधिकारी, सदस्य व कार्यकर्ते उपस्थित राहणार आहेत.
पनवेल येथे होणाऱ्या वर्धापन दिनाची तयारी गेल्या महिन्याभरापासून सुरु आहे. मंडपा पासून पार्कींग व्यवस्था, आसन व्यवस्था अशी सर्वच तयारी करण्यात आली आहे. शेकापच्या वर्धापन दिनामुळे कार्यकर्त्यांमध्ये एक वेगळा उत्साह निर्माण झाला आहे. हजारोच्या संख्येने कार्यकर्ते या मेळाव्यात सामिल होणार आहेत. तालुका स्तरावरील पदाधिकारी गावोगावी, खेड्यापाड्यात जाऊन कार्यकर्त्यांना भेटले. महिला,तरुण वर्गांसह ज्येष्ठ कार्यकर्त्यांकडून या बैठकांच्या माध्यमातून चांगला प्रतिसाद मिळाला. त्यामुळे अनेक कार्यकर्ते, तरुण, तरुणी, कार्यकर्ते आदींनी वर्धापन दिनाला येण्यासाठी जोरदार तयारी केली आहे. नाक्या-नाक्यावर लाल बावटे व स्वागताचे फलक लावण्यात आले आहेत. वर्धापन दिनाच्या निमित्ताने कार्यकर्त्यांना एक वेगळी उर्जा मिळणार आहे. मेळाव्याची तयारी अंतिम टप्प्यात आहे. जिल्ह्यातील कार्यकर्त्यांनी मोठ्या संख्येने उपस्थित राहण्याचे आवाहन शेकाप जिल्हा चिटणीस सुरेश खैरे यांनी केले आहे.
