पाणी, रस्त्याच्या समस्येवर सात दिवसात तोडगा काढा अन्यथा तीव्र आंदोलनाचा इशारा
पेण रायगड : पेण तालुक्यातील माळवाडी आदिवासी वाडीतील नागरिकांना पाण्यासाठी वणवण करावी लागत आहे. जल जीवन मिशन योजनेस तीन वर्षे होऊनही काम पूर्ण न केल्याने पाणीटंचाईला सामोरे जावे लागत आहे. या विरोधात संतप्त नागरिकांनी थेट रायगड जिल्हा परिषदेच्या (उंबर्डे) पेण येथील ग्रामीण पाणी पुरवठा विभागाच्या कार्यालयात सोमवारी (२१) ठिय्या मांडून पाणी संकटास जबाबदार असलेल्या ठेकेदार व ग्रामीण पाणी पुरवठा विभागाच्या अभियंत्यांवर तात्काळ कारवाई करण्याची मागणी केली तर पुढील सात दिवसात माळवाडीच्या पाणी प्रश्न व रस्त्याच्या समस्येवर तोडगा न निघाल्यास जिल्हाधिकारी कार्यालयावर मोर्चा काढण्यात येईल, असा इशारा ग्राम संवर्धन सामाजिक संस्थेचे अध्यक्ष संतोष ठाकूर यांनी दिला आहे.
एकीकडे भारत देश महासत्ता झाल्याच्या वल्गना करीत डिजिटलायझेशनच्या मोठमोठ्या घोषणा करणारी सरकारी यंत्रणा स्वातंत्र्याच्या ७७ वर्षानंतरही आदिवासीना रस्ते, पाण्यासारख्या मूलभूत सुविधा देऊ शकली नसल्याचे वास्तव वारंवार समोर येत आहे. पेण तालुक्यातील ग्रुप ग्रामपंचायत आंबिवली हद्दीतील माळवाडी आदिवासी वाडीच्या निमित्ताने हे वास्तव पुन्हा एकदा समोर आले आहे. ग्रुप ग्रामपंचायत आंबिवली हद्दीतील माळवाडी या आदिवासी वाडीला आजपर्यंत शुद्ध पाण्याच्या व्यवस्थेसह रस्ता देखील नाही. सदर वाडीला पिण्याच्या पाण्याची व्यवस्था नसल्याने दोन वर्षांपूर्वी शितोळेवाडी आणि माळवाडी या दोन आदिवासी वाड्यांसाठी जल जीवन मिशन मधून सुमारे सेहेचाळीस लाख रुपयांची योजना मंजूर करण्यात आली. याचा ठेका अलिबाग तालुक्यातील चाळमाळा येथील सतीश सुधाकर घरत या ठेकेदाराला देण्यात आले. या योजनेचे काम डिसेंबर २०२४ मध्ये पूर्ण होणे अपेक्षित असताना आजही अर्धवट आहे. विशेष म्हणजे सदर योजनेचे काम सुरू असताना ठेकेदार किंवा ग्रामसेवक एकदाही वाडीत फिरकले नसल्याचे संतप्त आदिवासी भगिनींनी सांगितले असून पाणीपुरवठा विभागाच्या अभियंत्यांमुळेच आजपर्यंत ५० टक्केही काम पूर्ण झालेले नाही. मालवाडीत बांधण्यात येत असलेल्या जलसंचय टाकीचे कामही अर्धवट सोडले आहे. याबाबत पाणीपुरवठा विभागाचे अभियंता रमेश राठोड यांना वारंवार सांगून देखील कोणतीही उपाययोजना न केल्यामुळेच आमच्यावर पाणीटंचाईचे संकट ओढावल्याने हांडावर पाण्यासाठी दोन किलोमीटर पायपीट करून शितोळेवाडी येथील तलावातील दूषित पाणी प्यावे लागत आहे यास सर्वस्वी ग्रामीण पाणी पुरवठा विभागाचे अभियंता रमेश राठोड आणि संबंधित ठेकेदार जबाबदार असल्याने या दोघांचीही चौकशी करून कारवाई करावी व तात्काळ योजनेचे काम पूर्ण करावे यासाठी संतप्त आदिवासींनी ग्राम संवर्धन सामाजिक संस्थेचे अध्यक्ष रायगड भूषण सामाजिक कार्यकर्ते संतोष ठाकूर यांच्या नेतृत्वात सोमवारी ग्रामीण पाणी पुरवठा विभागाच्या कार्यालयात जाऊन ठिय्या मांडला त्यानंतर अभियंता रमेश राठोड यांनी उद्या प्रत्यक्ष पाहणी करून तात्काळ पाणीपुरवठा करण्याच्या दृष्टीने प्रयत्न करणार असल्याचे सांगितले मात्र हे आदिवासी एवढे संतप्त होते की त्यानंतर लागलीच पेण पंचायत समितीचे गटविकास अधिकारी अविनाश घरत व तहसीलदार तानाजी शेजाळ यांची प्रत्यक्ष भेट घेऊन लेखी निवेदन दिले यावेळी सामाजिक कार्यकर्ते संतोष ठाकूर यांनी पुढील सात दिवसात रस्ता आणि पाण्याच्या समस्येवर तोडगा न निघाल्यास तीव्र आंदोलन करण्याचा इशारा दिला आहे.
