रायगड (खास प्रतिनिधी): किल्ले रायगडावर जाण्यासाठी असणारा पायरी मार्गाचा आज दुपारी काही दगडी भाग कोसळला. महादरवाजाच्या जवळील हा भाग कोसळून मार्ग नादुरुस्त झाला आहे. दरम्यान या मार्गानेच हजारो शिवभक्त गडावरती येजा करत असतात. तरी आज कोणत्याही प्रकारची दुर्घटना झाली नसली तरी भविष्यात हा मार्ग धोकादायक ठरू शकतो.
किल्ले रायगड वर चित्तदरवाजा इथून जाणारा पायरी मार्गाचा महादरवाजा येथील काही भाग आज दुपारी कोसळला. या कोसळल्या भागामुळे सदरचा मार्ग नादुरुस्त झाला असून पर्यटकांसाठी आजचा दिवस हा मार्ग बंद ठेवण्यात आला आहे. सार्वजनिक बांधकाम विभागाच्या वतीने या ठिकाणी तात्पुरते पाईप बांधून मार्ग सुरक्षित करण्याचा प्रयत्न केला आहे. मात्र असे असले तरी येणाऱ्या काळात कोसळणाऱ्या पावसामुळे किल्ले रायगड वरती जाणारा हा पायी मार्ग धोकादायक ठरू शकतो. या ठिकाणी मोठी दुर्घटना होण्याची शक्यता आहे. किल्ले रायगडावरील प्राधिकरणाच्या माध्यमातून अनेक विकास कामे केली जात आहेत. यामध्ये चित्तदरवाजा ते महादरवाजा मार्गे किल्ले रायगड वरती जाणाऱ्या या पायरी मार्गाचा देखील समावेश आहे. बऱ्याच ठिकाणी या पायरी मार्गाचे काम सुरू आहे तर काही ठिकाणी हे काम पूर्ण झाले आहे. 
मात्र वारंवार या कामाच्या बाबतीमध्ये त्याच्या दर्जाच्या गुणवत्तेबाबत आरोप केले जात आहेत. काही वर्षांपूर्वी अशाच पद्धतीने या ठिकाणी पायरी मार्ग कोसळला होता तसेच खूबलढा या बुरुजाचा काही भाग देखील कोसळला होता. या ठिकाणी होत असलेली कामे ही निकृष्ट दर्जाची असल्याचा आरोप सातत्याने होत आहे त्यामुळे सदरचा मार्ग हा यापुढे धोकादायक करू शकत आहे.
