मुंबई (प्रतिनिधी): राज्य मंत्रिमंडळाच्या बैठकीत आज महाराष्ट्र पोलीस दलातील सुमारे १५ हजार पदांच्या भरतीस मंजुरी देण्यात आली. मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीत सन २०२४-२५ मधील पोलीस शिपाई भरती प्रक्रियेला हिरवा कंदील मिळाला. विशेष म्हणजे, २०२२ आणि २०२३ मध्ये वयोमर्यादा ओलांडलेल्या उमेदवारांनाही यंदा एकदाच संधी देण्यात येणार आहे.
या भरतीत पोलीस शिपाई १०,९०८, पोलीस शिपाई चालक २३४, बॅण्डस्‌मॅन २५, सशस्त्री पोलीस शिपाई २,३९३ आणि कारागृह शिपाई ५५४ अशी पदे समाविष्ट आहेत. भरती प्रक्रिया जिल्हा स्तरावर होणार असून, प्रथम शारीरिक चाचणी आणि त्यानंतर OMR पद्धतीची लेखी परीक्षा घेण्यात येईल. संपूर्ण प्रक्रियेची जबाबदारी प्रशिक्षण व खास पथके विभागाचे अतिरिक्त पोलीस महासंचालक यांच्याकडे असेल.
राज्यात कायदा-सुव्यवस्था अबाधित ठेवण्यासाठी शिपाई संवर्गातील पदे अत्यंत महत्त्वाची असल्याचे मानले जाते. उच्च आणि सर्वोच्च न्यायालयाने वेळेत ही पदे भरण्याचे निर्देश दिले होते. तसेच, विधिमंडळातील चर्चेत लोकप्रतिनिधींनीही वारंवार भरतीची मागणी केली होती. या निर्णयामुळे पोलीस दलावरील ताण कमी होऊन कार्यक्षमता वाढण्याची अपेक्षा आहे.
