अलिबाग (प्रतिनिधी): अलिबाग येथील भाग्यलक्ष्मी हॉलमध्ये यशोधन सहकारी पतसंस्थेची 23 वी वार्षिक सर्वसाधारण सभा मोठ्या उत्साहात पार पडली. या सभेत संस्थेच्या आर्थिक प्रगतीचा आढावा घेताना, संस्थेला आर्थिक वर्ष 2024-25 मध्ये तब्बल 44 लाख 45 हजार रुपयांचा निव्वळ नफा झाल्याची माहिती अध्यक्ष शेखर वागळे यांनी दिली. मागील शिल्लक धरून संस्थेकडे एकूण 44 लाख 49 हजार रुपयांची शिल्लक असल्याचे त्यांनी स्पष्ट केले.
ठेवींमध्ये लक्षणीय वाढ
संस्थेच्या ठेवींमध्ये गेल्या वर्षाच्या तुलनेत मोठी वाढ झाल्याचे अध्यक्षांनी नमूद केले.
गतवर्षीची ठेवी : 12 कोटी 9 लाख रुपये
यावर्षीची ठेवी : 13 कोटी 6 लाख रुपये
एकूण वाढ : 97 लाख रुपये
“ही वाढ आकड्यांची नसून सभासदांच्या विश्वासाची पावती आहे. संस्थेचा खरा आधार म्हणजे सभासदांचा विश्वास आणि एकता,” असे वागळे यांनी सांगितले.
पारदर्शक व सुरक्षित व्यवहार
सभेत संस्थेचे ऑडिटर संदीप गोठीवरेकर यांनी संस्थेचे सर्व व्यवहार पूर्णपणे पारदर्शक असून ठेवीदारांचे पैसे शंभर टक्के सुरक्षित असल्याचा ठाम विश्वास व्यक्त केला. तसेच कायदेशीर सल्लागार अॅड. किरण कोसमकर यांनी संस्थेच्या भावी प्रगतीसाठी मार्गदर्शन केले.
सायबर गुन्हे प्रतिबंध जनजागृती
कार्यक्रमाला उपस्थित असलेल्या अलिबाग पोलीस ठाण्याचे निरीक्षक किशोर साळे यांनी डिजिटल अरेस्ट, हनी ट्रॅप आणि सायबर क्राईम विषयक जनजागृती केली. वाढत्या सायबर गुन्ह्यांच्या पार्श्वभूमीवर नागरिकांनी अधिक सजग राहण्याचे आवाहन त्यांनी केले.
गुणवंतांचा सत्कार
सभेच्या निमित्ताने शिक्षण क्षेत्रात उल्लेखनीय कामगिरी करणारे दादा क्लासेसचे दादा वारीसे व मारोती भगत यांचा सत्कार करण्यात आला.
उपस्थिती
सभेत संस्थेचे पदाधिकारी, सभासद, ठेवीदार यांची मोठ्या संख्येने उपस्थिती होती. उत्साही वातावरणात संपन्न झालेल्या या सभेत संस्थेच्या पुढील प्रगतीचा संकल्प पुन्हा दृढ करण्यात आला.
