कामोठेमधील दांपत्य माणिक पाटील व सुबोध पाटील जबर जखमी
दहशतवाद्यांनी अमरधाम यात्रेकरूंची नावे आणि धर्म विचारत केला अंदाधुद गोळीबार
पनवेलमधून निसर्ग ट्रॅव्हल्सद्वारे ३९ पर्यटक गेले होते यात्रेला
जम्मू काश्मीर येथील पहेलगाममध्ये झालेल्या दहशतवादी हल्ल्यात नविन पनवेल सेक्टर १२ येथील दिलीप देसले हे मृत्युमुखी झाले आहेत. तर कामोठे येथील सुबोध पाटील आणि माणिक पाटील हे पती-पत्नी जखमी झाले असून त्यांच्यावर उपचार सुरू आहेत. त्यांना श्रीनगर येथील हॉस्पिटलमध्ये उपचारासाठी दाखल करण्यात आले असून त्यांची प्रकृती स्थिर असल्याची माहिती मिळत आहे.
अमरनाथ यात्रेसाठी पनवेलमधून निसर्ग ट्रॅव्हल्सद्वारे ३९ पर्यटक रवाना झाले होते. २१ एप्रिल ते ३० एप्रिल दरम्यान ही पिकनिक निघाली होती. या यात्रेत देशभरातून सहभागी होणाऱ्या पर्यटकांना पहलगाम येथे गाठून मंगळवारी दहशतवाद्यांनी हल्ला करण्यात आला. धक्कादायक बाब म्हणजे या ठिकाणी आलेल्या पर्यटकांना त्यांचे नाव आणि धर्म विचारत गोळ्या झाडण्यात आल्या.दरम्यान, या हल्ल्यात जखमी झालेले माणिक पाटील हे कस्टममधून सेवावृत्त कर्मचारी आहेत. कामोठे पोलीस ठाण्याच्या वरिष्ठ पोलीस निरीक्षक विमल बिडवे यांनी त्यांच्या निवासस्थानी भेट देत परिस्थितीचा आढावा घेतला. रात्री उशिरापर्यंत त्या पाटील यांच्या कुटुंबीयांसमवेत प्रशासनाशी संपर्क साधत होत्या तर पनवेलमधील अन्य कोणाला मदत लागल्यास सहकार्य करत होत्या.
पहलगाम मधील परिस्थिती अद्याप नाजूक असून या ठिकाणी काही पर्यटक अडकले आहेत. त्याबाबत माहिती मिळण्यासाठी आणि पर्यटकांच्या नातेवाईकांना माहिती देण्यासाठी श्रीनगर येथे मदत कक्ष स्थापन करण्यात आला आहे. अमरनाथ यात्रेत पनवेल आणि रायगड जिल्ह्यातूनही काही पर्यटक गेले आहेत. त्यांच्या कुटुंबीयांनी मदतीसाठी श्रीनगर येथील ०१९४- २४६३६५१ / २४५७५४३/ २४८३६५१ किंवा ७७८०८०५१४४ / ७७८०९३८३९७ / ७००६०५८६२३ या व्हाट्सअप क्रमांकावर संपर्क साधावा असा आवाहन शासना तर्फे करण्यात आले आहे.
