रायगड (खास प्रतिनीधी): रायगड जिल्ह्यात सात दिवसांच्या गणरायासह गौराईला मंगळवारी निरोप दिला जाणार असून, या पार्श्वभूमीवर ठिकठिकाणी मिरवणुका काढण्यात येणार आहेत. विसर्जन मिरवणुकीदरम्यान कोणताही अनुचित प्रकार घडू नये यासाठी पोलीस प्रशासनाने बंदोबस्त ठेवला आहे. विशेषतः वयोवृद्ध, लहान मुले व महिलांना त्रास होणार नाही, याची काळजी आयोजक आणि नागरिकांनी घ्यावी, असे आवाहन करण्यात आले आहे. मिरवणुकीत लेझरचा वापर पूर्णपणे बंदीस्त असून त्याचा वापर न करण्याचे निर्देश देण्यात आले आहेत. उत्सवाच्या निमित्ताने मोठ्या संख्येने भाविक सहभागी होतात, त्यामुळे शिस्त आणि शांततेत विसर्जन पार पाडणे आवश्यक आहे. सण आनंदोत्सवाच्या वातावरणात कोणत्याही गोंधळाशिवाय पार पडावा, यासाठी पोलीसांनी नियोजन केले असून नागरिकांनी सहकार्य करावे, असे आवाहन रायगडचे पोलीस अधीक्षक आंचल दलाल यांनी केले आहे.
