रायगड (प्रतिनिधी): सात दिवसांच्या भक्ती, श्रद्धा आणि आनंदमय वातावरणानंतर आज रायगडकरांनी आपल्या लाडक्या बाप्पाला निरोप देण्यास सुरुवात केली आहे. गणेशोत्सवाच्या निमित्ताने जिल्हाभरात भाविकांनी गणरायाची मनोभावे सेवा, पूजन आणि आराधना केली. आज गणपती बाप्पासह माहेरवाशीणी गौरींचेही विसर्जन सुरू झाले असून जिल्ह्यात ठिकठिकाणी पारंपरिक मिरवणुकांना सुरुवात झाली आहे.
ढोल-ताशांच्या गजरात, खालू बाज्यांच्या नादात आणि “गणपती बाप्पा मोरया, पुढच्या वर्षी लवकर या” अशा घोषणांनी संपूर्ण जिल्हा दुमदुमून गेला आहे. पारंपरिक पोशाखात सजलेले गणेशभक्त मिरवणुकीत आनंदाने नृत्य करत आहेत. वातावरणात भक्तीभाव आणि उत्साह यांचा सुंदर संगम पाहायला मिळत आहे.
यंदा जिल्ह्यात एकूण 56 हजार 468 गणपती मूर्ती आणि 16 हजार 175 गौरी मूर्ती विसर्जित करण्यात येत आहेत. नदी, तलाव, विहीर आणि समुद्र या नैसर्गिक जलाशयांबरोबरच कृत्रिम तलावांमध्येही विसर्जनाची व्यवस्था करण्यात आली आहे. पर्यावरणपूरक विसर्जनासाठी प्रशासनाने विशेष प्रयत्न केले असून ठिकठिकाणी पोलीस बंदोबस्त ठेवण्यात आला आहे.
विसर्जनाच्या वेळी पावसाचं सावट असूनही भक्तांचा उत्साह मात्र ओसंडून वाहताना दिसतो आहे. महिलांपासून लहानग्यांपर्यंत सगळ्यांनीच उत्साहाने सहभाग घेतला आहे. विसर्जन मिरवणुकीदरम्यान कुठलीही अनुचित घटना घडू नये म्हणून स्थानिक प्रशासन, स्वयंसेवी संस्था आणि गणेश मंडळे दक्ष राहिली आहेत.
गेल्या आठवडाभरात घराघरात आणि सार्वजनिक मंडपांमध्ये बाप्पाची भक्ती, पूजा, भजन-कीर्तन, सांस्कृतिक कार्यक्रमांनी गणेशोत्सव साजरा झाला. आज या सगळ्या आठवणी मनात साठवत रायगडकरांनी आपल्या गणरायाला आणि गौरींना साश्रुनयन निरोप दिला. श्रद्धा, भक्ती आणि उत्साहात न्हालेला हा सोहळा, पुढच्या वर्षी गणरायाच्या पुनरागमनाची आतुरतेने वाट पाहत असल्याचे चित्र जिल्हाभरात दिसले.
