अलिबाग (प्रतिनिधी) : पनवेलचे तहसीलदार विजय पाटील यांना अनियमिततेमुळे निलंबित करण्यात आले आहे. औद्योगिक उपयोगासाठी खरेदी झालेल्या काही जमिनींना महाराष्ट्र कुळवहिवाट व शेतजमीन अधिनियम, १९४८ चे कलम ६३-एक-अ चे पालन न करता अकृषिक सनद देण्याची प्रक्रिया नियमबाह्य रीत्या करण्यात आल्याचा ठपका ठेवण्यात आला आहे.
ही कारवाई महाराष्ट्र नागरी सेवा वर्तणूक नियम, १९७९ चे उल्लंघन केल्यामुळे करण्यात आली असून निलंबन आदेश अवर सचिव प्रवीण पाटील यांच्या सहीने जारी झाला आहे. निलंबन काळात त्यांचे मुख्यालय जिल्हाधिकारी कार्यालय, रायगड येथे राहील आणि पूर्व परवानगीशिवाय मुख्यालय सोडता येणार नाही. वारदोली, पोयंजे, भिंगारवाडी, भिंगार, पाली बुद्रुक आणि भेरले या गावांतील जमिनीच्या प्रक्रियेत अनियमितता आढळली आहे.
