अलिबाग (प्रतिनिधी): अलिबाग वडखळ रस्त्याची अवस्था अतिशय वाईट झाली आहे. रस्त्यावर ठिकठिकाणी मोठे खड्डे पडले असून, या खड्ड्यांमुळे वाहनांचे नुकसान होत आहे. प्रवासी तसेच पर्यटक खड्ड्यांमुळे त्रस्त झाले आहेत. खड्ड्यात आपटून वाहनांचे नुकसान तर होतेच, पण अनेक वेळा प्रवाशांनाही दुखापत झाली आहे. दररोज या मार्गावरून प्रवास करणाऱ्यांसाठी हा मार्ग जीवघेणा ठरू लागला आहे.
या रस्त्याचे चौपदरीकरण करण्यासाठी त्याला महामार्गाचा दर्जा देण्यात आला होता. मात्र, चौपदरीकरणाची कामे अद्याप सुरू झालेली नाहीत. तसेच साधी दुरुस्तीही केली जात नाही. त्यामुळे प्रवाशांमध्ये संताप व्यक्त केला जात आहे. “तुझा की माझा?” या वादात रस्ता अडकून पडला असून कोणत्या विभागाने दुरुस्ती करावी यावरून स्पष्टता नाही, अशी परिस्थिती निर्माण झाली आहे.
पर्यटकांसह स्थानिक नागरिकांचा मुख्य मार्ग असल्याने या रस्त्याची दुरवस्था गंभीर झाली आहे. अपघातांचे प्रमाण वाढल्याने नागरिकांनी प्रशासनाकडे वारंवार तक्रारी केल्या, तरीही ठोस उपाययोजना करण्यात आलेल्या नाहीत. प्रवासी वाहनांचे मोठ्या प्रमाणात नुकसान होत असल्याने आर्थिक फटका बसतो आहे. त्याचबरोबर वेळेचा आणि श्रमांचा अपव्यय होत आहे.
प्रशासनाने तातडीने या रस्त्याची दुरुस्ती करून खड्डे बुजवण्याची आणि चौपदरीकरणासाठी कामे लवकर सुरू करण्याची मागणी नागरिक व पर्यटकांकडून जोर धरत आहे. अन्यथा आंदोलन छेडण्याचा इशारा देखील स्थानिकांनी दिला आहे. हा रस्ता दुरुस्त होणे अत्यंत गरजेचे आहे, अशी भावना सर्व स्तरातून व्यक्त केली जात आहे.
*******
रायगड जिल्ह्याची राजधानी असणाऱ्या अलिबाग तालुक्यातील सर्व रस्त्यांची अवस्था दयनीय आहे जिल्हा औद्योगिकरणाने प्रसिद्धीस येत आहे. त्याचबरोबर अलिबाग तालुक्यात आरसीएफ, गेलं आणि एचंपीसीएल आशा मोठ्या कंपन्या आहेत. आता तालुक्यात नवीन उद्योग येणार आहेत त्याचे भूसंपादन होण्याचे काम सुरू आहे असे असताना अलिबाग वडखळ रस्ता अजूनही रखडलेला आहे. रस्ता चौपदरी होणार असल्याने जनता आनंदी होती परंतु रस्ता रखंडल्याने सर्वसामान्यांचे हाल होत आहेत यामुळे सरकारने तातडीने अलिबाग वडखळ रस्ता चौपदरी करावा।
पंडित पाटील माजी आमदार
