अलिबाग (प्रतिनिधी): शेतकरी कामगार पक्षासाठी समर्पित आयुष्य घालवणाऱ्या स्व. मीनाक्षी पाटील यांनी पुरोगामी विचार जपण्याचे आणि ते रुजविण्याचे उल्लेखनीय कार्य केले. त्या प्रभावी वक्त्या आणि नेतृत्व गुणांनी परिपूर्ण नेत्या होत्या. पाटील घराण्याला लाभलेले हे रत्न वक्तृत्वाच्या जोरावर समाजकारणात पुढे आले. त्यांच्या विचारांमुळे अनेक महिलांना आणि तरुणांना प्रेरणा मिळाली. त्यांच्या जयंतीनिमित्त अलिबाग येथे जिल्हास्तरीय वक्तृत्व स्पर्धेचे आयोजन करण्यात आले असून त्याला मोठा प्रतिसाद मिळत आहे. या स्पर्धेमुळे प्रतिभावंत विद्यार्थ्यांना आपले विचार मांडण्याची संधी मिळत आहे, तसेच समाजात सकारात्मक विचार आणि नेतृत्व गुण वाढीस लागण्यास मदत होणार आहे.
स्पर्धेचा प्रभाव राज्यभर पोहोचला पाहिजे आणि अधिकाधिक लोकांनी यामध्ये सहभागी व्हावे यासाठी प्रयत्न करण्याचे आवाहन ॲड. मानसी म्हात्रे यांनी केले. त्यांनी सांगितले की, या स्पर्धेला उंची मिळावी यासाठी संस्थांनी, समाजातील नेत्यांनी आणि युवकांनी पुढाकार घ्यावा. अशा उपक्रमांमुळे समाजाला बळ मिळते आणि नव्या पिढीला योग्य दिशा मिळते.
