अलिबाग (प्रतिनिधी): रायगड जिल्ह्यात पर्यटनदृष्ट्या महत्त्वाचा असलेला अलिबाग – वडखळ महामार्ग सध्या खड्ड्यांनी व्यापलेला आहे. या रस्त्याची दुरवस्था पाहून अलिबागकर दोन दिवसांपूर्वी रस्त्यावर उतरले आणि संबंधित अधिकाऱ्यांना धारेवर धरत दुरुस्तीच्या मागणीसाठी आंदोलन केले. त्यानंतर प्रशासनाने तातडीने कार्यवाही करत या रस्त्याच्या दुरुस्तीला आजपासून सुरुवात केली आहे.
या कामासाठी तब्बल १८ कोटी रुपयांचा निधी मंजूर करण्यात आला असून नागरिकांमध्ये दिलासा निर्माण झाला होता. पर्यटनाला चालना देणारा हा मार्ग सुरळीत झाल्यास पर्यटकांसह स्थानिकांचेही मोठे फायदे होणार आहेत. परंतु दुरुस्तीच्या कामाची सुरुवात झाली असली तरी प्रत्यक्ष कामाच्या दर्जाबाबत नागरिकांनी असंतोष व्यक्त केला आहे.
कामात पुन्हा निकृष्ट दर्जा दिसून येत असून संबंधित ठेकेदारांकडून हलगर्जीपणा होत असल्याचा आरोप स्थानिकांनी केला आहे. काही ठिकाणी खड्डे बुजवण्याची प्रक्रिया व्यवस्थित न करता फक्त वरवर काम केल्याचे चित्र आहे. यामुळे अलिबागकर पुन्हा रस्त्यावर उतरून आंदोलन करत आहेत.
रस्त्याच्या दुरुस्तीच्या नावाखाली मोठा निधी खर्च होत असतानाही कामाचा दर्जा समाधानकारक नसल्याने नागरिकांचा संताप वाढला आहे. पर्यटनासाठी महत्त्वाचा असलेला हा मार्ग असताना दुरुस्तीच्या कामात कसूर होणे गंभीर बाब मानली जात आहे.
संबंधित प्रशासनाने तातडीने कामाची गुणवत्ता तपासावी आणि ठेकेदारांवर कारवाई करून योग्य दर्जाचे काम करावे, अशी नागरिकांची मागणी आहे. हा रस्ता दुरुस्त होणे अत्यावश्यक असून पर्यटक आणि स्थानिक यांचा प्रवास सुलभ व्हावा यासाठी प्रशासनाने अधिक दक्ष राहणे गरजेचे आहे.
