रायगड (प्रतिनिधी):रोहा – कोलाड – भाले मार्गावर १५ सप्टेंबर रोजी अपघाताची भीषण घटना घडली. रोहा आगाराची एम.एच.२० बी.एल.३८६६ ही एस.टी. बस सकाळी साडे ११ वाजण्याच्या सुमारास पलटी झाली. भाले ते जावाटे दरम्यान समोरून येणाऱ्या वाहनाने निष्काळजीपणे कट मारल्याने बसचालकाचा ताबा सुटला आणि बस रस्त्याच्या कडेला असलेल्या खड्ड्यात जाऊन कोसळली.
बसमध्ये एकूण ८ प्रवासी होते. त्यामध्ये भाले येथील ४ विद्यार्थी शाळेकडे निघाले होते. त्यांच्यासोबत एक शिक्षक व इतर ३ प्रवासी होते. सुदैवाने कोणतीही गंभीर दुखापत झाली नाही, मात्र सर्व प्रवासी किरकोळ जखमी झाले. अपघाताची माहिती मिळताच भाले ग्रामपंचायतीचे सरपंच, सदस्य व अधिकारी घटनास्थळी पोहोचले. त्यांनी जखमींची विचारपूस करून तातडीने मदत केली. स्थानिक डॉक्टरांनी जखमींवर उपचार केले असून त्यांची प्रकृती स्थिर असल्याचे सांगितले.
ही घटना परिसरात भीतीचे वातावरण निर्माण करणारी ठरली आहे. प्रवाशांच्या सुरक्षेचा मुद्दा पुन्हा एकदा चर्चेत आला असून संबंधित प्रशासनाने काळजी घेण्याची गरज व्यक्त होत आहे.
