रसायनी (प्रतिनिधी) : बनावट पोलीस असल्याची बतावणी करून नागरिकांची फसवणूक करणाऱ्या टोळीवर रसायनी पोलिसांनी कारवाई केली आहे. १० सप्टेंबर रोजी चांभाळ येथे दोन अनोळखी इसमांनी “साहेब आम्ही पोलीस आहोत” असे सांगून तक्रारदाराची टाटा टियागो कार (MH-46-AU-6906) लंपास केली होती. यानंतर कारची नंबर प्लेट बदलून ती फसवणुकीसाठी वापरण्यात आली.
घटनेनंतर पोलिसांनी गुन्हा नोंदवून तपास सुरू केला. सीसीटीव्ही फुटेज, गुप्त माहिती आणि तांत्रिक तपासाच्या आधारे आरोपींचा मागोवा घेतला असता, आरोपी अजिंक्य उर्फ अभिजीत अनंत शिंदे (वय ३५, रा. पनवेल) याला अटक करण्यात आली. त्याच्यावर पूर्वीही खून, जबरी चोरी, चोरी असे गंभीर गुन्हे दाखल असल्याचे निष्पन्न झाले आहे. त्याचा साथीदार इकबाल अब्दुलकादीर शहा (रा. चिपळे, पनवेल) हा सध्या फरार असून त्याचा शोध सुरू आहे.
या कारवाईत पोलीस अधीक्षक आँचल दलाल यांच्या मार्गदर्शनाखाली उपविभागीय पोलीस अधिकारी विशाल नेहल व पोलीस निरीक्षक संजय बांगर यांच्या पथकाने महत्त्वाची भूमिका बजावली.
दरम्यान, पोलिसांनी नागरिकांना आवाहन केले आहे की, कोणताही अनोळखी इसम पोलीस असल्याचे सांगून वाहन किंवा मौल्यवान वस्तू मागत असल्यास तत्काळ नजीकच्या पोलीस ठाण्यात किंवा डायल 112 वर संपर्क साधावा.
