अलिबाग (प्रतिनिधी): रायगड जिल्ह्यातील हिंदी विषयातील पहिल्या पी.एच.डी. डॉ.अनुपमा दिलीप धनावडे ,रा पेण यांना नुकतीच देवाज्ञा झाली.’साठोत्तरी नाटकों मे नारी चित्रण’ हा त्यांच्या संधोधनाचा विषय होता.स्वामी विवेकानंद शिक्षणसंस्था,कोल्हापूर संचालित डॉ.पतंगराव कदम आर्ट्स आणि कॉमर्स कॉलेज,पेण येथे त्यांनी प्राचार्या म्हणून अनेक वर्ष कारभार पाहिला.रायगड जिल्ह्यातील विद्यार्थ्यांनी भरपूर शिकून मोठे व्हावे असा त्यांचा आग्रह असायचा.मुंबईपेक्षा पेणमध्येच पी.एच.डी. शिक्षणाची सोय व्हावी म्हणून त्यांच्या अपार मेहनतीने आणि सातत्यपूर्ण पाठपुराव्याने पतंगराव कॉलेजमध्ये एम.ए आणि पी.एच.डी. शिक्षण केंद्र सुरु करण्यात त्यांना यश आले होते.पी.एच.डी. मार्गदर्शक म्हणून सुद्धा त्यांनी महत्वपूर्ण भूमिका बजावून रायगड मधील अनेक तरुण तरुणींना त्यांनी मार्गदर्शन केले होते.
अतिशय सामान्य परिस्थितून शिक्षण घेत त्यांनी आपले एम.ए. एम.फील. पी.एच.डी शिक्षण पूर्ण केले होते.कॉलेज आणि मुंबई विद्यापीठाच्या विविध स्तरांवरील कमिटींमध्ये त्यांनी महत्वपूर्णभूमिका बजावली होती.त्यांच्या बहुमूल्य शैक्षणिक,सामाजिक कार्यासाठी त्यांना आदर्श शिक्षिका,शिक्षक रत्न अश्या अनेक
विविध पुरस्कारांनी सन्मानित करण्यात आले होते.’अधुनातन विधा:वैविध्य’ आणि ‘साठोत्तरी हिंदी नाटक नारी-चित्रण’ अशी त्यांची दोन पुस्तके सुद्धा प्रकाशित आहेत.
त्यांच्या पश्चात मागे पती दिलीप धनावडे निवृत्त जिल्हा लेखा परीक्षा अधिकारी,मुलगी दीप्ती आणि मुलगा वैभव धनावडे अभियंता म्हणून कार्यरत असून रायगड मधील नवोदित लेखक कवी म्हणून नामारूपास येऊ पाहत आहे.’
वयाच्या 66 व्या वर्षी डॉ.अनुपमा दिलीप धनावडे यांनी जगाचा निरोप घेतल्याने सर्वत्र हळहळ व्यक्त केली जात आहे.
