मुंबई : मुख्यमंत्री-माझी लाडकी बहीण योजनेच्या लाभार्थ्यांसाठी e-KYC प्रक्रिया सुरू करण्यात आली आहे. यासाठी लाभार्थ्यांनी https://ladakibahin.maharashtra.gov.in या अधिकृत संकेतस्थळाला भेट द्यावी.
मुखपृष्ठावर असलेल्या e-KYC बॅनर वर क्लिक केल्यानंतर फॉर्म उघडेल. त्यात आधार क्रमांक व पडताळणी संकेतांक (Captcha) भरून, आधार प्रमाणीकरणासाठी संमती द्यावी व Send OTP बटणावर क्लिक करावे. संबंधित आधार-लिंक मोबाईल क्रमांकावर प्राप्त झालेला OTP टाकल्यानंतर Submit केल्यास प्रणाली लाभार्थ्याची KYC आधीच पूर्ण आहे की नाही याची माहिती दाखवेल.
जर KYC पूर्ण असेल, तर “e-KYC आधीच पूर्ण झाली आहे” असा संदेश दिसेल.
जर KYC प्रलंबित असेल, तर लाभार्थ्याचा आधार क्रमांक पात्र यादीत असल्यास पुढील टप्पा सुरू होईल.
यानंतर पती किंवा वडिलांचा आधार क्रमांक टाकून OTP पडताळणी करावी लागेल. पुढे जात प्रवर्गाची निवड करून खालील घोषणा (Declaration) करावी लागेल –
1. कुटुंबातील कोणताही सदस्य शासकीय/स्थानिक स्वराज्य संस्थेत कायमस्वरूपी कर्मचारी नसल्याची व निवृत्तीनंतर पेन्शन घेत नसल्याची खात्री.
2. कुटुंबातील केवळ एका विवाहित आणि एका अविवाहित महिलेलाच या योजनेचा लाभ मिळत असल्याची नोंद.
ही प्रक्रिया पूर्ण केल्यानंतर “Success – तुमची e-KYC पडताळणी यशस्वीरित्या पूर्ण झाली आहे” असा संदेश स्क्रीनवर दिसेल.
ही ऑनलाइन प्रक्रिया लाभार्थ्यांसाठी सुलभ आणि पारदर्शक ठरेल, असा विश्वास शासनाने व्यक्त केला आहे.
