नवी मुंबई (प्रतिनिधी) : नवी मुंबई विमानतळाचं उद्घाटन लवकर होणार आहे. या पार्श्वभूमीवर एअर इंडिया ग्रुपने नवी मुंबई आंतरराष्ट्रीय विमानतळ येथून सेवा सुरू करण्याची घोषणा केली आहे. या विमानतळावरील पहिल्या टप्प्यातील सेवा लवकरच सुरू होणार असून एअर इंडिया एक्सप्रेस येथून सेवा देणारी पहिली कंपनी असेल. एअर इंडिया एक्सप्रेस 15 शहरांसाठी दररोज 20 उड्डाणे सुरू करणार आहे. यामुळे मुंबईत ये जा करणाऱ्या प्रवासासाठी प्रवाशांना एक नवा पर्याय उपलब्ध होणार आहे. २०२६ च्या मध्यापर्यंत ही संख्या ५५उड्डाणांपर्यंत वाढवण्याचा मानस आहे, ज्यात ५ आंतरराष्ट्रीय उड्डाणांचा समावेश असेल. २०२६ च्या हिवाळ्यापर्यंत दररोज सुमारे ६० उड्डाणे सुरू करण्याचे उद्दिष्ट आहे.
दरम्यान, नवी मुंबई आंतरराष्ट्रीय विमानतळाच्या उद्घाटनाची तारीख पुन्हा एकदा बदलली आहे. पूर्वी ३० सप्टेंबर रोजी पंतप्रधान नरेंद्र मोदी यांच्या हस्ते या विमानतळाचे उद्घाटन होणार असल्याचे जाहीर करण्यात आले होते. पण वनमंत्री गणेश नाईक यांनी नुकतेच याबाबत स्पष्ट केले की, ३० सप्टेंबरला उद्घाटन होणार नाही. सततच्या हवामान बदलामुळे हा निर्णय घेतल्याचे सांगण्यात येत आहे. अशातच पंतप्रधान नरेंद्र मोदी यांचा मुंबई दौरा देखील रद्द झाला आहे. यामुळे पुन्हा एकदा संभ्रम निर्माण झाला आहे.
नवी मुंबई आंतरराष्ट्रीय विमानतळाच्या उद्घाटनाच्या तारखेत बदल झाल्यामुळे प्रकल्पग्रस्तांच्या भावना तीव्र होत आहेत. दि.बा. पाटील यांच्या नावाने विमानतळाचे नामकरण करण्याची मागणी प्रकल्पग्रस्तांनी जोरदारपणे केली आहे. या संदर्भात वनमंत्री गणेश नाईक यांनी सांगितले की, मुख्यमंत्री देवेंद्र फडणवीस यांनी दि.बा. पाटील यांच्या नावास संमती दिली आहे आणि केंद्र सरकारच्या अंतिम मंजुरीनंतर या विमानतळाला “दि.बा. पाटील आंतरराष्ट्रीय विमानतळ” असे नामकरण केले जाईल, मात्र याबाबत कोणतेच ठोस आश्वासन मिळत नसल्याने स्थानिकांमध्ये असंतोष वाढू लागला आहे.
