नवी मुंबई (प्रतिनिधी): नवी मुंबई आंतरराष्ट्रीय विमानतळाच्या उद्घाटनाचा मुहूर्त ठरला असून, येत्या ८ ऑक्टोबर रोजी पंतप्रधान नरेंद्र मोदी यांच्या उपस्थितीत हा कार्यक्रम होणार असल्याची माहिती सूत्रांकडून समजते. यासोबतच मुंबईतील मेट्रो-३चे व मेट्रो-२ बीचे उद्घाटनही पंतप्रधानांच्या हस्ते होणार असल्याचे सूत्रांनी सांगितले. नवी मुंबईतून विमानोड्डाण करण्यासाठी सिडकोसोबत ‘एनएमआयएएल’ची लगबग सुरू झाली आहे. पंतप्रधानांच्या या दौऱ्याची आखणी अंतिम टप्प्यात असून, गुरुवारपासून संबंधित सरकारी विभागांमध्ये बैठकांचे सत्र सुरू झाले आहे. सद्यस्थितीत ‘एमएमआरसीएल’ची मेट्रो-३ ही बीकेसी ते आरेपर्यंत धावत आहे. मात्र आता उद्घाटनानंतर ही मेट्रो कुलाबा ते बीकेसी अशी ३५ किलोमीटर धावणार आहे. तर मेट्रो-२ बी ही मंडाले ते डायमंड नगर यादरम्यान धावणार असून, या मार्गावर चार स्थानके आहेत. एअर इंडिया समूहाने नवी मुंबई विमानतळावरून एअर इंडिया एक्स्प्रेसची २० उड्डाणे होणार असल्याचे नुकतेच जाहीर केले आहे. देशातील १५ शहरांसाठी या विमानतळावरून उड्डाणे होणार आहेत. भविष्यात एअर इंडिया समूहाचा या विमानतळावरून ५५ ते ६० उड्डाणे करण्याचा मानस आहे.
मुंबई- अहमदाबाद बुलेट ट्रेनबाबतही मोठी बातमी समोर आली आहे. बुलेट ट्रेन नवी मुंबई विमानतळाला जोडली जाणार असल्याची माहिती समोर आली आहे. यासंदर्भातला प्रस्ताव रेल्वे बोर्डाकडे सादर केल्याची माहिती सूत्रांनी दिली आहे. रेल्वे, रस्ते, हवाई मार्ग असलेल्या बुलेट ट्रेन कॉरिडॉरची निर्मिती केली जाणार आहे. प्रवासाचा वेळ वाचवण्यासाठी या कॉरिडॉर निर्मिती केली जाणार आहे. जर या प्रस्तावाला मान्यता मिळून जर बुलेट ट्रेन नवी मुंबईतील विमानतळाला जोडली गेली तर याचा प्रवाशांना चांगला फायदा होईल. मिळलेल्या माहितीनुसार, मुंबई- अहमदाबाद बुलेट ट्रेन नवी मुंबईतील आंतरराष्ट्रीय विमानतळाला जोडली जावी यासंदर्भातला प्रस्ताव रेल्वे बोर्डाकडे सादर करण्यात आला आहे. यासाठी रेल्वे, रस्ते, हवाई मार्ग असलेला एक बुलेट ट्रेन कॉरिडॉर निर्माण होईल का यावर देखील सध्या चर्चा सुरू आहे. प्रवाशांचा प्रवास सुसाट आणि सुखकारक व्हावा यासाठी हा प्रयत्न आहे. या कॉरिडॉरच्या निर्मितीमुळे प्रवासाच्या वेळेत बचत होईल असा अंदाज वर्तवला जात आहे. मात्र रेल्वे बोर्डाकडून याबाबतच्या प्रस्तावाबाबत काहीच सांगण्यात आले नाही. पण या बाबत चर्चा सुरू असल्याचे सुत्रांनी सांगितले. या प्रोजक्टमुळे मुंबई आणि नवी मुंबईदरम्यानच्या कनेक्टिव्हिटीमध्ये सुधारणा होण्याची शक्यता आहे. याचसोबत बुलेट ट्रेनमुळे त्यांना नवी मुंबई एअरपोर्टवर पोहचणे सोपे होईल. पण यासंदर्भात गेलेल्या प्रस्तावावर रेल्वे बोर्डाकडून नेमका काय निर्णय घेतला जाईल हे महत्वाचे ठरणार आहे.
