मुरुड (प्रतिनिधी): मुरुड तालुक्यातील विहूर येथील वाकड्या आंब्याच्या वळणावर आज दुपारी १.३० वाजण्याच्या सुमारास एसटी बस आणि टेम्पो यांच्यात झालेल्या भीषण अपघातात टेम्पोतील १३ प्रवासी जखमी झाले आहेत. या धडकेत टेम्पो चालकही गंभीर जखमी झाला असून त्याला अलिबाग सिव्हिल हॉस्पिटलमध्ये हलवण्यात आले आहे.
प्राथमिक माहितीनुसार, अलिबाग येथून मुरुडकडे येणारी एसटी बस (क्र. एमएच २० बीएल ३६४०) आणि अलिबागच्या दिशेने जाणारा टेम्पो (क्र. एमएच ०६ बीडब्ल्यू ४६३३) वाकड्या आंब्याजवळील अवघड वळणावर आमनेसामने धडकले. टेम्पो चालकाचा गाडीवरील ताबा सुटल्याने हा अपघात घडल्याचे पोलिस सूत्रांनी सांगितले. या धडकेत दोन्ही वाहनांचे मोठे नुकसान झाले आहे.
टेम्पोतील प्रवासी मजगाव आणि नांदगाव येथील असून ते नवरात्रोत्सव निमित्त मुरुड येथील कोटेश्वरी देवीचे दर्शन घेऊन परतीच्या प्रवासाला निघाले होते. मात्र विहूर येथे हा अपघात झाला. जखमींना तातडीने ग्रामीण रुग्णालय, मुरुड येथे दाखल करण्यात आले असून त्यांच्यावर आवश्यक उपचार सुरू आहेत. गंभीर जखमींना पुढील उपचारासाठी अलिबाग येथे हलविण्यात आले आहे.
अपघातानंतर मुरुड पोलिसांनी तत्परतेने घटनास्थळी दाखल होऊन रस्ता वाहतुकीसाठी मोकळा केला तसेच जखमींना रुग्णालयात पोहोचवण्याची महत्वपूर्ण जबाबदारी पार पाडली. सुदैवाने या अपघातात कोणतीही जीवितहानी झाली नसली तरी जखमी प्रवाशांची संख्या मोठी असल्याने परिसरात खळबळ उडाली आहे.
